Los umans e los chimpanzés an solament un 1% de diferéncia genetica. Lo genòma que legís las proteïnas de las doas espècias es estonantament parièr. Per melhor comprene çò que nos fa venir umans e diferents d’autras espècias, malgrat que plan pròchas, de cercaires decidiguèron d’estudiar quins cambiaments genetics avián entraïnat la transformacion finala de nòstre cervèl.
Per ansin, una còla scientifica de l’Institut Soís de Bioïnformatica SIB e de l’Universitat de Lausana desvolopèron, a travèrs d’una nòva analisi de l’ADN uman, una nòva draia per estudiar quins cambiaments cerebrals avián entraïnat la naissença de nòstra espècia. La resulta dobrirà, de segur, de nòvas perspectivas per estudiar l’evolucion umana al nivèl biologic. L’estudi es publicat dins la revista numerica Science Advances.
Çò que fa venir diferenta l’espècia
Ja fa temps que divèrses cercaires an soslinhat que çò que fa venir diferenta l’espècia umana de, per exemple, las autras espècias de primats qu’existisson encara, seriá pas la sequéncia de l’ADN mas cossí s’exprimís aqueste, çò es la regulacion dels gèns. Mas aquò èra sonque una ipotèsi fins ara e o caliá poder demostrar.
Segon Marc Robinson-Rechavi, que dirigiguèt aquel nòu estudi, “ per assajar de trapar la responsa a de desenats de questions scientificas caliá èsser plan positiu e identificar quinas parts del genòma uman foguèron jos la dicha seleccion positiva. La responsa poiriá fòrça ajudar a desvolopar la recèrca biomedicala”.
Aital, aqueles cercaires an desvolopat un nòu metòde que permetiá d’identificar divèrsas regions cerebralas, e an demostrat qu’aquestas avián patit de cambiaments genetics pendent la longa evolucion umana. Los scientifics an restacat lo cervèl amb l’estomac e an pogut desmostrar que lo primièr aviá patit fòrça cambiaments evolutius, en relacion amb l’estomac. Aquò es considerat coma un grand succès pr’amor qu’ara ja pòdon èsser identificadas las regions geneticas umanas que patiguèron mai de cambiaments evolutius.
Puèi, los cercaires an restacat aquelas regions geneticas amb las d’autras espècias de primats, coma lo chimpanzé e lo gorilla. Aquò a donat una vision encara mai clara sus lo cambiament patit per aquelas regions cerebralas d’un biais genetic, e una melhora compreneson de l’evolucion umana. E tot aquò sens demembrar qu’un cambiament genetic dins una espècia, tanben conegut coma mudacion, es, al començament, ni bon ni marrit per aquel organisme. Es sonque una traça genetica que permet d’identificar quora aquela espècia se desseparèt de son ancessor. Mas, ara, enfin, la sciéncia a trapat quinas èran aquelas regions geneticas. Puèi, cal assajar de comprene perqué cambièron.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
