Segon un estudi realizat fa gaire per de geològs angleses e escoceses, un meteòr gigant (d’aperaquí 1 quilomètres de diamètre) truquèt amb la nòstra planeta fa 1,2 bilions d’annadas. Las descobèrta del luòc ont truquèt e lo cratèr laissat foguèt considerat per la còla de geològs una bèla capitada apuèi d’annadas de recèrca e atanben una granda coincidéncia.
Segon la quita còla de geològs de las universitats d’Oxford e d’Aberdeen, lo primièr còp que trobèron d’evidéncias d’aquel tras qu’ancian truc cosmic foguèt quora ne descobriguèron de rèstas geologicas en Ullapool, en Escòcia, l’an 2008. Dempuèi alara qu’èra estada estudiada la region a la recèrca d’un possible cratèr, consequéncia d’aquel truc. Segon divèrsas evidéncias geologicas èra possible que foguèsse situat prèp de la còsta escocesa mas i aviá pas res solide.
Es ara qu’una còla de geològs d’aquelas universitats dirigida per Ken Amor trobèt ont èra tombat aquel meteòr. Lo cratèr se trapava a 15 quilomètres a l’oèst de la còsta escocesa. “Es una tròba fantastica pr’amor que lo cratèr que daissa un meteòr coma aquel es plan malaisit de lo trapar apuèi 1.200 milions d’annadas, çò confirmèt Amor”.
D’annadas per trapar un cratèr
Per ansin, apuèi estudiar lo luòc, la distribucion de las ròcas e de particulas magneticas, podèren trobar, fin finala, ont èra tombat lo meteòr. Segon los geològs fa 1,2 bilions d’ans solament i aviá vida a la Tèrra als oceans e encara i aviá pas de plantas en tèrra. Escòcia seriá a l’eqüator e i auriá un environament tras que sec.
Prèp d’ailà i a de pichons cratèrs de pichons meteòrs que tanben truquèron la Tèrra a l’epòca. Un meteòr gigant coma aquel pòt tombar scientificament sus la planeta un còp cada 100.000 ans. ”De segur que foguèt un fach tras qu’estonant que cambièt l’environament regional pendent fòrça temps, çò afirmèt Amor”. L’estudi foguèt publicat al numeric Journal of the Geological Society.
La Redaccion
