Mai d’una organizaciona ecologica comencèt ja a avertir sul dangièr del cambiament climatic actual que patís la mediterranèa, la nòstra mar. Per ansin, d’organismes coma WWF confirmèron que la biodiversitat d’aquesta mar poiriá patir mai de la mitat de la pèrta de la siá biodiversitat en mens de 60 annadas.
Per aquò far WWF estudièt durant meses l’impacte qu’a aquel cambiament sus mai de 80.000 espècias dins 35 ecoregions de la planeta. La resulta dins la Mediterranèa es seriosa; prèp de 60% de plantas e entre 45% e 60% dels mamifèrs poirián dessaparéisser abans de la fin d’aqueste sègle se la temperatura contunha en tot montar coma fa uèi lo jorn.
Un rapòrt alarmant
Aital, WWF soslinhèt amb lo rapòrt Vida Salvatja e Escaufament Global, que la mar mediterranèa serà una de las mars de la planeta que mai patiràn lo cambiament climatic. Un dels piègers scenàris que se poiriá debanar al Mediterranèu segon aquesta organizacion ecologica seriá una creissença màger de la temperatura actuala (d’efièch un 20% mai que en d’autras mars ja es çò que se debana) e doncas un augment de mai de 4,5º poiriá provocar l’extincion dirècta e rapida de mai d’un 49% d’espècias d’aucèls que i demòran, un 57% dels anfibians e tanben un 43% dels reptils, se i pòt aver pas una migracion vèrs d’airals pus fregs.
Un panorama desolant
E arrivar pas a l’Acòrdi Climatic de Paris (çò es subrepassar pas los 2º d’augment de temperatura globala) entraïnariá l’extincion de mai de 25% del total de las espècias de la planeta. E de luòcs coma Amazonas pòdon arribar a perdre fins a mai del 50% de las espècias de plantas e fauna.
En de regions coma Miombo, en Africa meridionala, l’environament poiriá patir l’extincion de fins a un 90% dels anfibians, 86% d’aucèls e 80% dels mamifèrs. En d’illas coma Madagascar poirián desaparéisser fins al 60% de las siás espècias. A mai d’aquò, lo sud-oèst australian patiriá l’extincion del 89% dels anfibians tanben pr’amor del cambiament climatic actual.
Per se desengatjar d’aquò, WWF prepausèt garentir de passatges ecologics que poirián ajudar divèrsas espècias a migrar d’un luòc a un autre e aital melhor subreviure. Car la migracion d’una espècia d’una region a una autra pòt demenir fins a un 25% lo risc d’extincion de la meteissa e aquò maugrat la creissença de la temperatura globala.
La Redaccion
