QUE CAU JA CERCAR VIDA DEHÒRA DERA PLANETA

Ei çò qu’an demandat oficiauments un grop de scientifics pendent era darrèra reunion d’astronòms americani. Diuèrsi astronòms demandèren ara NASA poder començar ja ua recerca entara vida en d’autes planetes. E s’aguesta ei intelligenta melhor. Es scientifics diden que des deth descorbiment d’un senhau d’intelligéncia extraterrèstra hèt en 1960 damb un ràdio telescòpi en Green Bank, Virgina der Oèst, ei un tipe de recèrca que non siguec priorizada per NASA e que cau ara he’c.

Es scientifics que demandèren açò confirmèren qu’era recèrca de vida en d’autes planetes (un projècte qu’en anglés se ditz SETI o Search for Extraterrestrial Tecnological Intelligence) ei un camp dera sciéncia que non a normauments pro sòs entà se desvolopar ben pr’amor que non toti es astronòms i son d’acòrd.

Un d’aguesti scientifics, er astronòm Jason Wright, diguec pendent era darrèra amassada dera Societat Astronomica Americana que harien ua peticion oficiau entara NASA entà ensajar de poder començar d’auer sòs entara SETI. Pr’açò aqueth grop de scientifics confirmèc que ja auien escrit un grop de preposicions entara demanda de recèrca de çò que diden “tecnosignatures” (çò que pòt èster considerat quinsevolh senhau de tecnologia extraterrèstra, des de senhaus de ràdio enquia emissions de temperatura espaciau diferentes) entara NASA.

Era arribada deth SETI ath Congrès estatunitenc

Toti aguesti documents, hèti per aqueth grop de scientifics pr’amor que siguec era pròpria NASA er organisme que demandèc mès informacion sobre eth SETI, demoren que tot açò arribarà lèu, en 2020, ath Congrès des Estats Units e que, fin finau, aguest destinarà sòs entad aguest tipe de recèrca.

“Era tòca ei fòrça nauta, çò diguec Wright, dera Universitat Estatau de Pennsilvania, pr’amor que se era NASA ditz que cau auer sòs entà estudiar e hèr recerca scientifica sus açò, serà un hèt qu’era recèrca de vida intelligenta en d’autes planetes serà ua prioritat scientifica nacionau e fòrça mès scientifics poiràn trabalhar en açò”.

Aguesta mena de recèrca a coma origina eth descorbiment d’un senhau que venguie de dehòra dera planeta damb un ràdio telescòpi hèt per astronòm Frank Drake en 1960, Totun, qu’aguesta recèrca nomentada SETI non comencèc ena NASA enquia 1992 e mens d’ua annada dempús era recèrca de vida en d’autes planetes (damb nauta tecnologia) siguec anullada peth Congrès des Estats Units.

Maugrat tot açò, un institut coma er Institut SETI siguec fondat en Mountain View, en Califòrnia, en 1985 (que possibilitèc eth film Contact damb Jodie Foster). De mès, en 2015 es billionaris russi Yuri e Julia Milner volgueren tanben començar aguesta recèrca maugrat qu’era recèrca de tecnosignatures non ei encara ua disciplina scientifica considerada seriosa e qu’a pro recorsi.

“Un hèt ei clar, eth descorbiment de diuèrsi exoplanetes des der an 2009 a hèt cambiar fòrça era opinion scientifics mondiau, çò confirmèc Wright, e çò qu’abans non ère possible ara ac poirie èster. E era NASA tanben pòt cambiar d’opinion. Ei pr’açò qu’auem hèt aguesta peticion oficiau, entà auer pro sòs entà desvolopar ben aguesta recèrca coma ua vertadèra disciplina scientifica”.

Era Redaccion

Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita