La Nasa confirma que i poiriá aver de vida sus Titan

Fa gaire, la NASA demostrèt que son vejaire sus la possibilitat de trapar de vida dins lo quite Sistèma Solar èra real e, a mai, excepcional. Après la demanda de mai en mai granda d’una partida de la comunautat scientifica d’assajar de cercar de vida sus d’autras planetas, l’organisme espacial estatsunidenc diguèt, que òc, que o caliá assajar.

Aquò es un cambiament de vejaire estonant se parlam de la NASA, e la pròva l’avèm quand reconeis que pas luènh de la Tèrra i poiriá aver de vida: sus la luna de Titan.
Titan es una luna de Saturne: d’unes pòdon pensar qu’aquel satellit es tras que luènh pr’amor de la tecnologia espaciala que ne dispausa uèi lo jorn l’umanitat. D’autres encara pòdon arribar de pensar qu’es tras qu’estonant qu’un organisme oficial governamental coma la NASA pòsca ara reconéisser que i poiriá aver de vida e mai encara dins lo pròpri Sistèma Solar.

Mas ara la nòva cap del programa de recèrca de monds amb oceans de la NASA –Roadmaps to Ocean World Group–, Amanda Hendrix, estonèt l’opinion publica mondiala après aver confirmat que la NASA poiriá mandar lèu una mission espaciala per estudiar aquela luna pr’amor que se crei que sus Titan i poiriá aver de vida.

Segon Hendrix, sus Titan i a d’oceans e tanben de pluèjas d’idrocarburs e pr’amor d’aquò i “poiriá aver una forma estranha de vida extraterrèstra qu’aguèsse lo metan coma basa. Titan, çò diguèt la scientifica de la NASA, es un mond estranh qu’a, a l’ora d’ara, lo nivèl mai naut d’escasenças d’aver de vida dins lo Sistèma Solar. E aquesta poiriá èsser trobada lèu”.

Cal comprene qual tipe de vida

En mai d’aquò, la cap d’aquel programa de la NASA afirmèt qu’èra de besonh de “comprene totalament se los oceans presents sus Titan pòdon aver de vida e s’es aital, qual tipe de vida contenon”. A mai, cal remembrar que Titan es una luna plan especiala pr’amor que l’ocean que i a es jos la superfícia lunara e que tanben a de lacs d’idrocarburs liquids; per ansin poiriá aver de vida.

Malgrat l’estonament general de la premsa quand aquel cap de la NASA soslinhèt tot aquò, Hendrix volguèt que foguèsse clar que lo tipe de vida que lo cercarà la NASA sus Titan es pas coma totes podèm pensar pr’amor dels filmes de sciéncia-ficcion. Hendrix volguèt soslinhar que se i a una mena de vida sus Titan, aquò seriá una vida simpla, pas mai.

Segon la NASA, doncas, ara la tòca de l’exploracion espaciala serà desparièra. Fins a uèi se pensava que Mart poiriá conténer de vida. Mas se vegèt que sus aquela planeta n’i pòt pas aver. Titan seriá per la NASA lo primièr còrs celèst ont la vida poiriá èsser trapada. Puèi vendrián Encelad, la seisena luna mai granda de Saturne e encara Euròpa, la luna pus pichona a l’entorn de Jupitèr.

Totun, Hendrix volguèt soslinhar que la radiacion de Jupitèr sus Euròpa es fòrça intensa e que per aquela rason i enviar una mission espaciala seriá plan malaisit. Encelad serià de melhor vesitar pr’amor qu’envia de material marin dirèctament dins l’espaci. Malgrat tot, Titan a la primièra plaça per la NASA a l’ora d’ara per i cercar de vida. Un cambiament de vejaire e de posicion oficiala tras qu’estonant. Vertadièrament los tempses càmbian. E fòrça.

La Redaccion

Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion