PLANETES HÈTES DE DIAMANTS
Es missions astronomiques dera NASA, damb eth telescòpi Hubble o es missions TESS e Kepler contunhen de hèr mès e mès estudis sus er univèrs on demoram. E ara bèri estudis confirmen que diuèrses exoplanetes poirien èster riques en carbòni e donques tanben poirien èster hètes damb diamants e silici.
Un d’aqueri estudis ei eth dera Universitat Estatau d’Arizòna e era Universitat de Chicago, que confirmèren aquera composicion. “Son planetes totauments diferentes des autes deth nòste sistèma solar, çò diguec Harrison Allen-Sutter, dera Escòla d’Exploracion Espaciau dera Universitat d’Arizòna. E era sua formacion tanben serie fòrça diferenta”.
Atau, e tostemps segontes aqueri cercaires, quan es esteles e es planetes se formen, era sua origina prumèra son bromalhs de gas e pr’açò era sua formacion qu’ei parièra. E ua estela damb solament un shinhau de carbòni poirie entraïnar ua planeta coma era Tèrra, que non a guaire diamants ena sua composicion (d’aperaquí 0.001%).
Exoplanetes diferentes
Totun, que i a diuèrses exoplanetes que son ath torn d’estèles qu’an un nivèu de carbòni e tanben d’oxigèn fòrça mès naut. Segontes Allen-Shutter e tanben d’auti cercaires açò poirie voler díder que son exoplanetes fòrça rics en diamants e carburi de silici mès tostemps se i a tanben aigua.
Entà demostrar aguesta ipotèsi es cercaires volgueren recrear com ère er interior d’aqueres exoplanetes en tot utilizar calor e nauta pression. Era demostracion siguec hèta tostemps laguens un laboratòri. Prumèr meteren carburi de silici laguens aigua damb ua pression fòrça nauta. Dempús qu’observèren quina ne siguec era resulta. E aguesta siguec que, damb ua nauta pression eth carburi de silici venguec diamants e silici.
E tot açò ath còp qu’era recerca de vida en autes planetes contunhe. Aguest estudi volguec centrar era atencion en es proprietats de diuèrses planetes riques en carbòni e que non semblen auer vida. En mès d’açò, aqueres planetes non son guaire actiues geologicaments e açò poirie crear ua atmosfèra inabitabla. “Er estudi vò ajudar a compréner com poden èster quauqu’ues d’aqueres exoplanetes, çò diguec Allen-Sutter. Ei un camin fòrça long, mès cada còp ne coneishem mès e mès”.
Era Redaccion
Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita
