Un nòu estudi analizèt quin èra lo risc de mòrt entre subrevivents de COVID-19 (tanben aqueles qu’aguèron pas de besonh èsser espitalizats mas que tanplan la patiguèron) e confirmèt que lo risc de patir puèi de malautiás plan grèvas e arribar a morir es plan naut. Per ansin, la pandemia poiriá provocar los proplèus ans mai mòrts encara dins la populacion mondiala.
Plusors cercaires comencèron a sospechar que se debanava quicòm entre los subrevivents de COVID-19 car aprés subreviure la pandemia patissián divèrsas e grèvas malautiás. Per aquò la decision de far quel estudi. Per ansin, de cercaires de l’Escòla de Medecina de Washington en Sant Loís estudièron quin èra lo risc de morir aprés sièis meses de subreviure la pandemia. La resulta foguèt estonanta pr’amor que lo risc es plan naut. E cal avertir d’aquò, çò diguèron, a tota la populacion mondiala.
Per far aquel estudi los cercaires analizèron de donadas de mai de 5 milions de malauts dont 87 000 qu’aguèron de besonh anar a l’espital pr’amor de la COVID-19. La resulta de l’estudi foguèt publicada al numeric Nature. “Lo risc de patir una malautiá plan grèva aprés subreviure la COVID-19 es plan naut sonque sièis meses aprés, çò afirmèt Ziyad Al-Aly, professor de medecina. Lo long terme serà un problèma grand per la santat de milions de personas. E aquò es pas cap exageracion car i aguèt mai de 30 milions d’estatsunitencs que la patiguèron”.
Segon aquel estudi, aprés subreviure la COVID-19, las personas que la patiguèron an un risc de fins a 60% mai de risc de mòrt sonque aprés sièis meses de la patir. Alara lo nivèl es de 8 x 1000 e aquò sonque entre los que passèron una COVID-19 pas grèva. Los qu’aguèron de besonh èsser espitalizats lor risc arriba al 29 x 1000.
Plusor malautiás grèvas
Per ansin, l’estudi confirmèt que las personas que patiguèron COVID-19 pòdon aver sonque sièis meses aprés de problèmas grèus de santat e patir de problèmas respiratòris grèus, de malautiás grèvas dels sistèma nerviós, depression, problèmas de memòria, ansietat, insòmi, diabètes, obesitat, colesteròl naut, atacs de còr, palpitacions, divèrsas malautiás del ren, pèrda de cabèl, e anemia, a mai de fatiga e dolor generala.
Lo nivèl de patir aquelas malautiás aprés subreviure la COVID-19 arribèt fins al 50% pels malauts grèus de la pandemia del còp que los que patiguèron pas de problèmas grèus podián patir ara grèus problèmas de santat a long terme. “Aver patit la COVID-19 es plan grèu, car lo risc de patir puèi de grèus malautiás es fòrça mai naut entre los subrevivents, çò diguèt Al-Aly. E lo risc de mòrt tanben es plan naut. Aquò déu èsser conegut per tota la populacion mondiala”.
Totun, los cercaires qu’estudièron aquelas donadas volguèron soslinhar que cal estudiar d’un biais mai prigond aqueles subrevivents de la COVID-19 e pendent fòrça mai temps per poder balhar de chifras oficialas. Sonque aital pòdon demostrar quin es lo nivèl definitiu de patir mai malautiás aprés subreviure la pandemia. Car los efièches pòdon aparéisser sièis meses aprés o mai tard encara.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
