L’èst d’Alemanha, Belgica, Olanda e Luxemborg visquèron la setmana passada de grèus episòdis d’inondacions pr’amor de la creissença del nivèl d’aiga dels fluvis aprés de pluèjas tarriblas. I aguèt mai de 160 mòrts e pus de 1000 desapareguts. A l’ora d’ara l’armada e la policia alemanda sona encara a mand de los cercar e sauvar, se encara son vius. A mai d’aquò, las autoritats politicas de la region reconeguèron qu’aquò se debanèt pr’amor d’un cambiament climatic mai e mai prigond e grèu e qu’èra arribada l’òra d’actuar politicament se òm voliá arrestar un nombre encara mai naut de mòrts en euròpa.
Per ansin, lo president de l’estat alemand de Renània-Palatinat, Malu Dreyer, ont se debanèron qualqu’unas d’aquelas inondacions, confirmèt d’un biais oficial qu’aquel fenomèn s’èra debanat pr’amor del cambiament environamental “qu’aviá causat de temperaturas mai nautas e d’inondacions extrèmas dins un grand airal d’Euròpa”. Lo messatge foguèt clar per la populacion; lo cambiament climatic començava a èsser mai grèu malgrat l’avertiments dels darrièrs ans dels scientifics, e caliá quicòm far per o arrestar urgentment.
D’un autre costat, la presidenta de l’estat federal de Ren del Nòrd-Vestfàlia, Armin Laschet, que tanben patiguèt de grèvas inondacions e fòrça victimas, donèt la rason a Dreyer e considerèt qu’aquel episòdi de pluèjas s’èra passat pr’amor del cambiament climatic que patís la planeta a l’actualitat. E que caliá doncas prene de mesuras urgentas per l’arrestar.
Lo vejaire oficial politic
Segon semblariá èsser divèrses scientifics alemands avertiguèron d’un tipe d’episòdi climatic coma aquel fa sonque divèrsas setmanas mas la classa politica alemanda considerèt qu’quò èra pas possible. Uèi i a desenats de mòrts en Alemanha, Belgica e Paisses Basses e las autoritats vòlon se far escotar ara per la populacion sul cambiament climatic e las conseqüéncias que pòt aver sus l’òme lèu.
Per ansin, la presidenta de la Comission Europèa, Ursula von der Leyen demandèt d’accions urgentas a nivèl politic europèu per arrestar lo cambiament climatic abans de l’arribada d’episòdis catastrofics pus grèus: “ L’intensitat dels evenements pr’amor del cambiament climatic, çò diguèt von der Leyen, demòstra plan que cal agir d’un biais urgent se volèm aquò arrestar”.
Fin finala, e aprés se conéisser que la cancelièra alemanda, Angela Merkel se mostrèt terrorizada per l’episòdi d’aquelas inondacions (que tanplan afirmèt qu’avián coma causa primièra lo cambiament climatic) foguèt lo president de la Republica Federala d’Alemanha, Frank-Walter Steinmeier, lo politician que demandèt “d’accions urgentas per arrestar lo cambiament climatic”. Segon Steinmeier aquò èra de besonh “se òm voliá arrestar un cambiament climatic de mai en mai grèu e rapid”.
Segon aquel discors nòu de las nautas autoritats politicas europèas doncas cal ara esperar de nòvas politicas environamentalas a nivèl europèu se òm vòl arrestar, fin finala, lo cambiament climatic de la planeta. Un prètzfach que la sciéncia ja fa d’annadas qu’avertís. Se non, los proplèus episòdis catastrofics pr’amor d’una natura tras que fatigada de l’umanitat, poirián èsser encara mai grèus. E, benlèu, i aurà pas pus temps per o arrestar.
La Redaccion
