Ja èra conegut per los lors efèctes antioxidants. Çò que se sabiá pas èra que lo sieu consum tanben pòt provocar una pèrda de pes pr’amor del cambi de metabolisme dins lo fetge en tot transformar los nomentats bons metabolites. Aital o confirma un estudi fach sus de mirgas pendent mai de quatre setmanas e publicat fa pauc al numeric European Journal of Nutrition.
L’estudi confirmariá que lo consum de tè negre provòca una pèrtda de pes al delà d’autres beneficis per la santat en tot cambiar de bacterias dins l’intestin. Aital o a explicat una còla de recercaires de l’Universitat de Califòrnia.
“Avèm descobèrt que lo tè negre e lo tè verd càmbian lo nivèl de bacterias intestinalas en los animals – çò diguèt la cap de l’estudi Susanne Henning -. Lo percentatge de bacterias restacat amb l’obesitat èra mens e mens grand e las bacterias associadas amb la massa corporala sana creissián”.
Se d’autres estudis ja fachs afirmavan que los polifenòls del tè verd èran chuclats pel còrs umans e que cambiavan lo metabolisme energetic de lo fetge, ara s’es confirmat que los polifenòls del tè negre – tròp grand per èsser chuclats per l’intestin – ajudan far créisser las bacterias de l’intestin e la formacion d’acides grasses de lèu metabolisme, un tipe de bacterias que càmbia lo metabolisme del fetge”.
“Èra demostrat que los polifenòls del tè verd èran mai efectius e que balhavan mai beneficis per la santat que los del tè negre pr’amor que los elements quimics del tè verd èran chuclats directament per la sang – çò confirmèt Henning -. Mas ara podèm afirmar que lo tè negre tanben balha fòrça beneficis per la santat umana e entre eles la pèrda de pes en umans”.
Un te amb de prebiotics
Segon lo nòu estudi, ambedós tipes de tè, lo verd e lo negre, an de prebiotics, una substància que provòca la creissença de bons microorganismes qu’ajudan la santat umana. L’estudi es estat realizat a travèrs de desparièras diètas sus de mirgas: dos grops aguèron extràctes de tè verd o negre; amb pauca grassa e fòrça sucre, cap grassa e fòrça sucre, fòrça grassa e fòrça sucre e tanben extràcte de tè negre naut en grassas e sucres.
Après quatre setmanas, las mirgas qu’avián recebut d’extràctes de tè verd o negre avián lo meteis pes que las mirgas qu’avián recebut una dièta bassa en grassas. E tanben avián mens bacterias restacadas amb l’obesitat.
Totun, solament las mirgas qu’avián recebut extràcte de tè negre avián agut una creissença d’un tipe de bacterias nomentada Pseudobutirivibrio, qu’explicariá perqué lo tè verd e lo negre càmbian lo metabolisme dins los animals.
“Aquò suggerís que los beneficis per la santat umana del tè negre mas tanben del tè verd son mai grands encara que recebre d’antioxidants – çò diguèt un recercaire d’aquel estudi, Zhaoping Li -. Ambedós tès an un grand impacte en la creacion de flora microbiana. Aquò balha una nòva rason pels aimants del tè negre per contunhar de lo beure”.
La Redaccion
