Cèrtas algas toxicas qu’aurén aucit especimèns de mei de 200 espècias marinas a Austràlia. Segon aquera informacion, dada per un hum de mejans de comunicacion anglés, aqueras algas qu’aurén provocat la mort d’un sens nombre de làmias e rajas, qu’aurén acabat a la plaja d’aqueth continent. Segon los prumèrs espepisssaments que i aurén mei de 200 espècias diferentas marinas las qu’aurén patit aquera mortalitat. E un bon nombre d’aqueras qu’acabèn a l’a costa d’Austràlia meridionau.
Segon los ecologistas, aqueras espècias qu’aurén patit la fin pr’amor que patín ua vertadèra explosion d’algas toxicas a l’estenuda. Entad aqueth collectiu que seré estat com “un filme d’orror pèths peishs”. Aquera explosion e expansion de las algas de l’estenuda que comencè mensh de tres mes a, e las algas que s’aurén difusat au long de mei de 4.500 km², qu’ei un territòri marin autan gran com l’isla de Cangaró. Segon qualcunes cercaires, com Vanessa Pirotta, lo massacre qu’ei major pr’amor que las algas contunhan de créisher a l’actualitat, com se passè los darrèrs tres mes.
Autes scientifics enqüèra que confirmèn qu’aqueth tipe d’algas produsís deu poson que provòca la mort deus animaus a l’entorn deus medishs pr’amor que los nega. Atau, ua grana part de la vita marina d’aquera region marina que’s seré negada en tot incloure de peissum, de rajas e làmias. Lo massacre qu’estó principau pr’amor que i a pas guaire sovent explosions d’algas a un nivèu autan gran.
Ua vertadèra explosion d’algas toxicas
Atau, las toxinas provocadas per aqueras algas que pòden provocar de damnatge grèu au teissit corporau deu peissum pr’amor qu’atacan las cellulas ròjas. Segon un aute cercaire, John Martin, la densitat de las algas qu’ei autan gran que provòque la fin de l’oxigèn dens l’aiga e lo peissum se nega lèu. Un vertadèr filme d’orror entaus animaus, dit Martin.
Un nombre gran d’australians qu’enviè fòtos dab animaus morts a la plaja. En mei d’aquò, la preséncia de làmias e rajas dab sang, pr’amor que patín ua emorragia, qu’entrainè ua vision briga agradiva pr’amor que deishèn lo sable de la plaja de color ròi. Ua làmia grana de mei de tres mètres de longor qu’estó tanben trobada mòrta atau pr’amor d’aquò.
Los cercaires que tanben volón soslinhar que, de las 200 espècias marinas que patín las algas, que n’i a que son mei delicadas. Espècias com lo cranc de coralh o lo peish pilòta ne pòden pas se moure lèu e poguèron pas huéger deu poson de las algas. Totun, los cercaires que confirmèn qu’aqueth poson ei pas perilhós entaus umans. Mes qu’ei mélher de non pas entrar dens l’aiga.
Aqueth tipe d’explosion d’algas que’s debana periodicament quan ei mei caud e l’Austràlia meridionau patís aquesta annada ua ondada de calor despuish seteme de l’an passat dab temperaturas hòrt mei hautas de las normaus, qu’ei dinc a quasi 3 grads mei. En efèit Austràlia avèva patit pas ua explosion d’algas giganta com la d’aquera annada despuish 2014.
Mei d’ua pesqueria de la region barrèt de faiçon preventiva. E a la còsta mei d’un comèrci tanben que barrè, pr’amor de la fauta de toristas, que vòlen pas mei anar a la còsta pr’amor de l’explosion d’algas e la grana quantitat de peissum mort que i en las medishas. Segon lo governament d’aqueth estat australian, la massa d’algas adara que se dirigeish tà l’oèst e que’s vòu controlar lo lor movement entà poder díser se lo dangèr contunha o ei dejà acabat entà la fauna marina deu territòri.
La Redaccion
Aquesta cronica suu Ràdio País : https://soundcloud.com/radio-pais/natura-algas-toxicas?in=radio-pais/sets/natura
Fotografia principau: NOAA/CC
