Lo nuclèu terrèstre creis mai jos Asia que jos America del Sud. La causa es pas encara confirmada. Lo fenomèn poiriá aver de grèus conseqüéncias sul camp magnetic terrèstre, lo bloquièr de la Tèrra contra los rais marrits del Solelh. Un recent estudi sul nuclèu de la planeta confirmèt que i a quicòm de provoca que jos Indonèsia la calor s’esvapore pas tant rapid coma jos Brasil. L’estudi foguèt realizat per de cercaires de l’universitat de Califòrnia.
Per ansin, aquel fenomèn entraïna refregir lo fèrre e la creissença del nuclèu intèrn de la planeta. Aquò poiriá provocar de cambiaments sul camp magnetic terrèstre, segon de donadas publicadas al numeric Nature Geoscience. Car lo nuclèu terrèstre es una esfèra de fèrre e niquèl, amb un radi d’aperaquí 20% de la planeta e una edat de prèp de 1,5 bilions d’annadas. A mai,es l’estrat geologic pus prigond e benlèu lo mai important.
Aquò sonque pòt èsser mesurat a travèrs d’ondadas sismicas. E lo descobèrta dels sismològs estatsunitencs venguèt màger quand foguèt confirmat que i a un fenomèn que provoca la creissença d’un part del nuclèu mai rapida que d’autras, çò que provoca un nuclèu pas pus estable.
Una creissença regionala
Segon aquel estudi, aquela creissença, diferenta segon la region, provoca una solidificacion pas omogenèa del nuclèu terrèstre e aquò es pas çò que se pensava fins a uèi lo jorn . Car òm cresiá qu’aquela creissença èra omogenèa. De remembrar que, per tot aquò equilibrar i a en jòc la fòrça de la gravetat de la planeta. E son creats mai cristals de fèrre per o rengar. E pr’amor d’aquò la forma de la Tèrra es mai o mens la d’una esfèra.
Totun, que los cercaires demandèron poder estudiar d’un biais mai prigond aquel fenomèn geologic car las caracteristicas del nuclèu terrèstre e la siá capacitat de liberar la calor intèrna de la planeta es çò que provoquèt totjorn que la Tèrra aja forma d’esfèra; e aquò protegís tanben la planeta del Solelh. Un cambiament d’aquò poiriá entraïnar tanben de conseqüéncias grèvas sul clima de la planeta. Car, perqué se dissipa pas alavetz la calor del nuclèu d’un biais omogenèu e o fa sonque segon la region? Cal doncas estudiar d’una manièra mai eficaça aquela asimetria o determinar se aquel fenomèn es nòu o pas.
La Redaccion
