Una notícia estonanta foguèt publicada fa gaire al numeric Cell; divèrsas còlas de cercaires comencèron a trabalhar fa temps per desenvolupar d’embrions barrejats de doas espècias animalas diferentas; çò es d’umans e de monards. Val pas dire que la nòva dubriguèt una discussion gigantassa demest la comunautat scientifica internacionala per çò que tòca a la manipulacion genetica.
Per ansin, los scientifics que trabalhèron sus aquel projècte apertenon a l’Institut Salk d’Estats Units, de l’Universitat de Sciéncia e Tecnologia de Kumming, en China, de l’Universitat de Tèxas e tanben de l’Universitat Catolica San Antonio de Murcia, de l’estat espanhòl. Totas aquelas còlas foguèron dirigidas pel scientific espanhòl Juan Carlos Izpisúa Belmonte.
Segon foguèt confirmat, los cercaires poguèron desvolopar d’embrions mesclats d’umans e monards que poguèron subreviure fins a 20 jorns. La tòca èra poder aital comprene melhor divèrsas malautiás umanas mas es pro clar qu’aquel tipe d’embrions ja entraïna tota una sòrta de problèmas etics que benlèu cal resòlvre primièr abans d’i trabalhar biologicament.
Per Izpisúa Belmonte “aqueles embrions pòdon ajudar plan a l’ora de far recerca en biologia e medecina e pas sonque pendent las primièras etapas de la vida mas tanben al long de la fasa finala de l’existéncia dels èssers vius”.
Segon semblariá aqueles cercaires introduguèron de cellulas maire umanas amb de proteïnas fluorescentas en de placas de Petri d’embrions de monards macacos. Puèi l’embrion desvolopèt de nòvas e diferentas caracteristicas geneticas e molecularas de caduna d’ambedoas espècias. Çò que vòlon far ara es comprene aquela aliança entre espècias per crear d’organs pels umans.
La Redaccion
