Una notícia plan positiva ven d’arribar dels Pirenèus. Maugrat que ja fa prèp d’un sègle de la sieuna extincion en Catalonha, lo lop cervièr o linx – atanben conegut amb lo nom de gatillop en catalan- poiriá tornar èsser lèu considerada una espècia autoctòna d’aquel país. Es aital pr’amor de la naissença d’un pichon linx (pas linx iberic) en la reserva privada de Món Natura Pirineus, situada a la Val d’Àneu,ara fa dos meses.
Segon Miquel Rafa, director de Territòri e Environament de la Fondacion Catalonha La Pedrera “Semblava que n’auriam pas mai, çò diguèt, pr’amor qu’aviam una parelha de linxs europeus (Lynx lynx) dins MónNatura Pirineus dempuèi fa 11 annadas, mas en mai passat i aguèt una bèla suspresa. Aguèron un pichon linx que ja a dos meses de vida e pesa pus d’una quilograma. Fins uèi es amb sa maire e pòt pas encara demorar defòra de la reserva privada”.
Una extincion istorica
L’espècia de linx europèu o boreal (Lynx linx) s’escantilhèt als Pirenèus catalans fa prèp d’un sègle. Maugrat qu’es un mamifèr qu’encara pòt èsser vist de temps en quora en Occitània, al país vesin, Catalonha, lo darrièr especimèn foguèt caçat pendent la decada de 1930 en la Val de Ribes. Totun, que poiriá èsser que qualqu’un especimèn encara aguèsse subreviscut fins la fin del sègle XXen.
La parelha de lops cervièrs que i a en MónNatura Pirineus arribèt en 2008 de Galícia, ont nasquèron tanben dins un centre privat. La reproduccion se passèt de biais totalament natural. E maugrat que benlèu ne poirián venir mai, i a pas cap consens social per tornar l’espècia als bòsques catalans. D’efièch, en 2016 lo Síndic d’Aran demandèt aquò far mas de caçaires e d’elevaires diguèron non a la prepausta.
La Redaccion
