Après la confirmacion genetica que las populacions europèa e asiatica se crosèron geneticament (nòstra espècia) amb d’autras espècias omininas (denisovans e neandertalians), la populacion africana èra demorada coma una de las mai blosas. Mas ara un nòu estudi genetic a confirmat que tanben se crosèron dins lo passat almens amb una autra espècia ominina arcaïca escantida e fins ara desconeguda.
Se podiá imaginar, doncas, que la populacion umana d’Africa d’uèi èra pas barrejada geneticament amb d’autras espècias omininas pr’amor qu’èra pas coneguda cap d’espècia contemporanèa escantida. Mas un estudi genetic fach per una còla internacionala de cercaires sus divèrsas populacions africanas concluguèt que si qu’aviá existit una autra espècia ominina arcaïca, ara escantida, e que la populacion africana se crosèt amb ela mai d’un còp. Lors gèns son demorats fins uèi lo jorn, un fach que soslinhèt David Comas, professor d’Antropologia Biologica a l’universitat catalana Pompeu Fabra.
Un nòu scenari african
Los cercaires analisèron los gèns de plusors populacions africanas actualas amb de biaisses de viure e de lengas desparièras en diferents endreches del continent african. Aital, poguèron descobrir quala foguèt l’istòria generala de l’evolucion de la populacion africana, una istòria de mescla genetica.
“La diversitat genetica africana es estonanta e a per origina la mescla amb una populacion africana escantida, çò diguèt Oscar Lao, del Centre Nacional d’Analisis Geneticas. Foguèt una populacion arcaïca diferenta dels neandertalians o denisovans e demorèron sul continent un còp crosats geneticament amb nòstra espècia”.
La conclusion d’aquel estudi farà cambiar l’idèa que la populacion africana èra demorada blosa e isolada. E per ansin se cal demandar se se passèt pas coma en d’autras populacions mondialas coma l’europèa o l’asiatica, que se crosèron geneticament amb de neandertalians e denisovans. Es un vejaire nòu e lo cal estudiar amb mai de prigondor.
En mai d’aquò, los cercaires soslinhèron que caliá revisar la preséncia d’ADN d’autras espècias dins la populacion euroasiatica que poiriá venir dels neandertalians pr’amor que, çò dison, poiriá èsser fins a 3 còps pus nauta que se pensa, segon la resulta de l’estudi sus la populacion africana e lòrs gèns. L’estudi foguèt realizat a l’encòp per l’Escòla de Medecina de Yale, l’Universitat de Taibah (Arabia Saudita), Jondouba (Tunisia), Hèlsinki, Witwatsrand (Africa del Sud), Pompeu Fabra (Catalonha) e l’universitat estatsunidenca de Liban. L’estudi foguèt publicat dins la revista numerica Genome Biology.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
