Segon un nòu estudi scientific, lo corrent antartic seriá a mand de s’afondrar car la siá circulacion seriá pròcha de s’arrestar. Aquò poiriá provocar un cambiament climatic dins la region e tanben una nòva situacion per las fauna e flora d’aquel ecosistèma pendent los sègles venents.
L’estudi, publicat dins lo numeric Nature, confirmèt lo fenomèn e las siás possiblas consequéncias. L’aiga freja s’enfonza totjorn que mai dins la circulacion oceanica. Aquò se debana dins totes los corrents sosmarins de la planeta. Aquò tanben balha de calor, de dioxid de carbòni, d’oxigèn e de noiridura a la Planeta Blava. E es un factor fòrça important pel clima mondial, lo nivèl de la mar e los ecosistèmas marins.
“Avèm pogut confirmar que, se las emissions de dioxid de carbòni contunhan aital, lo corrent antartic reduirà la siá velocitat de fins al 40% los 30 ans avenidors, e aquò lo menarà gaireben a l’afondrament”, çò diguèt un dels cercaires.
250 bilions de tònas d’aiga
Lo corrent antartic transpòrta aperaquí 250 bilions de tònas d’aiga freja, salada e rica en oxigèn a l’entorn d’aquel continent cada an. Lo corrent, puèi, se’n va cap als oceans Indian, Pacific e Atlantic, çò que vòl dire qu’es un pauc com la lor font originala.
Fins a uèi lo jorn, es un corrent marin qu’es vengut mai o mens estable, mas ara amb de mai en mai emissions de dioxid de carbòni, comença de s’alentir. Se aquò contunhèsse, la vida dins los oceans jos los 4000 mètres finiriá.” E l’arrèst del corrent a ja començat, çò diguèt Steve Rintoul, que participèt a l’estudi. “Ja lo desglaçatge del continent rend l’aiga mens densa e aquò destorba lo corrent marin. Se la temperatura de la planeta monta, lo corrent demesirà la siá velocitat, solide”.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
