Un nòu estudi amb de camèras confirmariá que la populacion de leopards de las nèus, o d’onças, en Índia es plan mai granda que çò que se pensava. Segon lo govèrn indian, aquò demostrariá cossí l’estat indian susvelha la bona santat de las espècias animalas d’aquel soscontinent. L’estudi foguèt realizat sonque per l’onça (Panthera uncia) que viu en de luòcs de montanha pauc accessibles.
L’estudi foguèt realizat per scientifics de l’estat indian de Ladakh e tanben per l’Institut de la Fauna Salvatja d’Índia. Per Pankaj Raina, cercaire indian que participèt a l’estudi, « los grands carnivòrs son d’espècias iconicas e los aver dins un territòri es balhar als òmes d’optimisme sus la region ». En mai d’aquò, apondèt que lo leopard de las nèus a totjorn agut un impacte positiu per l’Imalaia e sens el l’ecosistèma pòt empejorar.
Segon los cercaires, l’onça, que demòra en 12 païses d’Asia centrala, es totjorn estada coneguda pel fach qu’es malaisit de la veire e de l’estudiar pr’amor del sieu territòri gigantàs. D’efièch, i auriá de leopards de las nèus sus mai de 52 000 km2 de territòri de l’estat indian de Ladakh, e calguèt estudiar tot aquel enòrme espaci per assajar de los trapar. De senhals indirèctes d’onças, d’orses bruns e tanben de linxes tanben foguèron lèu trobats.
Un fum de camèras
Los cercaires daissèron sul territòri mai de 956 camèras per poder espepissar mai de 8500 km2 del territòri d’aqueles carnivòrs. Lèu arribèron las resultas. Amb las fòtos poguèron identificar d’especimens individuals segon la lor pèl. A partir de tot aquò, los cercaires creson que i aurián mai de 477 leopards de las nèus en aquel territòri, un territòri (Ladakh) que correspond al 68% de la populacion totala d’onças en Índia.
Aital, la densitat dels leopards de las nèus en Ladakh seriá d’entre 1 e 3 especimens per cada 100 km2. Lo Pargue Nacional d’Hemis seriá l’airal amb una màger densitat d’onças pr’amor que lo 61% dels representants d’aquela espècia de Ladakh viurián ailà.
Segon los cercaires, la populacion de Ladakh aguèt totjorn de respècte pels leopards de las nèus, que son benvenguts perque favorisson lo torisme e l’argent. Aquò seriá la causa finala d’una populacion mai nombrosa d’aqueles felids dins la region. Totes los leopards foguèron classificats per mejan de fòtos e de camèras amb de perfum animal per atraire las onças.
Puèi l’IA identifiquèt los leopards amb de modèls que tròban de diferéncias dins lo cap dels carnivòrs. Per aquel sol metòde poguèron aver las nòvas donadas. La nauta qualitat d’aquel tipe d’estudi es estada demostrada. L’estudi es estat publicat dins lo numeric PLoS ONE.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
