La descobèrta de l’edat reala de las pinturas preïstoricas d’Altamira, a l’estat espanhòl, poiriá cambiar lo vejaire qu’avèm d’aquela epòca, pr’amor qu’ara son consideradas plan mai ancianas de çò que se pensava, çò es aperaquí 30.000 ans.
Aquesta descobèrta es la conclusion finala d’un nòu estudi sus las pinturas policromas d’Altamira. Ara, e segon aquel estudi son de pinturas qu’an mai de 30.000 ans e cal doncas las situar a l’epòca del gravetian, e benlèu encara abans e tot. L’estudi, que foguèt publicat al numeric internacional Journal of Arqueological Studies poiriá cambiar la nòsta compreneson d’aquel tipe d’art pr’amor de las nòvas datas de la pinturas.
De remembrar que la cauna d’Altamira es situada a 158 mètres sus lo nivèl de la mar en un airal de montanha pròche a la còsta de Cantàbria. Foguèt lo primièr luòc on foguèron descobèrtas de pinturas d’aquel tipe en 1880 de la man de Sanz de Sautuola, que, malgrat tot, poguèt pas demostrar la sieuna veridicitat. Fins se cresiá que l’edat de las meteissas èra de sonque 11.000 ans.
La cauna fa aperaquí 300 mètres de longor e a divèrsas cambras mas ara los cercaires utilizèron un nòu tipe de datacion (urani-tòri) sus las pinturas e demorèron estonats pr’amor de la resulta de las nòvas edats de las pinturas.
De pinturas plan mai ancianas
Segon las pinturas d’Altamira analizadas, l’edat de las meteissas ara seriá de 32.790 ± 4.830 ans pels senhals clavifòrmes. D’autras pinturas balhèron d’edats minimalas de 22.600 ± 70 ans e 32.020 ± 170 ans pels chivals pintats en roge. Las resultas confirmèron l’edat d’autres estudis realizats abans mas pas publicats encara.
Aquelas mòstras de pintura foguèron enviadas a un laboratòri independent e foguèron analizadas en 2012. Pasmens, las resultas foguèron polemicas e los cercaires las publiquèron pas fins ara pr’amor qu’èran pas segurs al 100 %. Pasmens, ara son segurs de las resultas e volguèron demostrar de biais scientific cossí èra estada trobada la nòva edat de las meteissas. Pels cercaires las nòvas edats de las pinturas d’Altamira refortisson la valor excepcionala d’aquela cauna e las lors pinturas coma Patrimòni de l’Umanitat.
La Redaccion
Fotografia principala: Matthias Kabel/CC.
