La cafeïna seriá una substància qu’es pas totjorn bona. Segon un recent estudi fach per de cercaires de l’Universitat de Rochester, seriá brica bona pendent l’emprenhament. La causa ne serián los tras qu’importants cambiaments en el cervèl que poirián aprés, al long de la vida, entraïnar plusors problèmas. Aquò vendriá aprés se conéisser que la cafeïna crosa aisidament la barrièra de la placenta car lo fètus auriá pas pro d’enzims per l’arrestar.
Per ansin, lo nòu estudi soslinha que los cambiaments que pòt patir lo cervèl del fètus se produsirián ja pendent lo temps qu’aqueste es dins l’utèr. “Los cambiaments que pòt patir lo fètus son pichonèls e causan pas de condicions psiquiatricas òrras, çò diguèt John Foxe, cap de l’estudi. Mas son de cambiaments que poirián provocar tanben de problèmas de conducha pendent lo futur. Aquò auriá d’entraïnar una revision dels efièchs a long tèrme que pòt provocar la cafeïna pendent l’emprenhament”.
“Çò de mai normal, çò contunhèt lo cercaire, seriá qu’aprés conéisser la resulta d’aqueste estudi nòu, cal soslinhar que prene cafeïna durant l’emprenhament es pas una bona idèa”. Per l’estudi los scientifics analizèron de donadas magneticas de pus de 9500 mainatges amb d’edats situadas entre los 9 e los 10 ans. L’estudi èra inclutz dins un autre pus grand sul desvolpament cognitiu e lo cervèl dels adolescents fach ongan.
De cambiaments pendent un temps long
Los cercaires de la còla que faguèt aqueste estudi trobèron que i aviá de cambiaments importants dins lo cervèl dels fètus se la maire beviá cafè durant un long període de temps pendent l’emprenhament. Pasmens, los cercaires tanben volguèron avisar que l’estudi èra estat fach de manièra retrospetiva sul remembre de maires qu’ara an de filhs amb d’edats compresas entre los 9 e los 10 ans.
Pendent l’estudi los cercaires trapèron que cèrts mainatges avián de problèmas de conducha desparièrs, una dificultat mai granda quand fasián atencion e amb d’iperactivitat. “ Çò de segur es que i a un tipe de conducha desparièr quand la maire aguèt de cafeïna pendent l’emprenhament, çò assolidèt Zachary Christensen, tanben participant d’aquel estudi.
D’anteriors estudis ja avián soslinhat que i aviá mainatges qu’avián de resultas diferentas quan fasián d’espròvas d’intelligéncia. D’autres encara mostravan prigondas piscopatologias. Pasmens, aquò foguèt mai restacat a la pròpria demografia sociala que non a una causa biologica. Per aquò, ara los cercaires creson poder començar a trabalhar mai sus aquò e çò que poguèt se debanar al cervèl del fètus durant l’emprenhament. E aquò que lo conselh medic actual ja es de beure pas mai de doas tassas de cafè de manièra jornalièra. L’estudi foguèt publicat al numeric Neuropharmacology.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
