L’espandiment de las idèas antievolucionistas uèi lo jorn es un fach encara tras qu’estonant. Amb una origina estatsunitenca que vòl trincar lo mite evolutiu de l’escalièr- un concèpte filosofic que cal comprene plan – son arribadas ara a Euròpa en tot liurar una vertadièra guèrra contra la sciéncia que sonque menarà l’umanitat a d’estadis culturals inferiors e l’enganada culturala generala.
Segon los antievolucionistas l’òme pòt pas venir de King-Kong (literal maugrat qu’aquel es un personatge de film de sciéncia-ficcion), es demorat totjorn en la planeta, atanben pendent l’epòca dels dinosaures, e fins quora i aviá dos solelhs (!) dins lo Sistèma Solar. Son pas de teorias, son de colhonadas que meritan pas l’atencion dels scientifics se foguèsse pas que de mai en mai i a pus personas qu’o creson.
L’evolucion foguèt pas un escalièr
A l’epòca de Darwin l’istòria de la via en la planeta sonque podiá èsser compresa se l’òme èra en naut d’un escalièr evolutiu coma representacion mai perfiècha de l’òbra de la natura. Solament aital podián los evolucionistas far comprene que l’origina mai pròcha dels umans èran de primats e qu’apuèi aqueles l’evolucion aviá menat l’espècia fins a l’Òme de Crosmanhon (cossí se diguèt a l’epòca). Pr’aquò l’Òme de Neanderthal aviá de caracteristicas bestialas e pr’aquò l’Òme de Java (descobèrt per Eugène Dubois en Trinil en 1891) qu’uèi classam coma Homo erectus èra encara mai luenh dins l’escalièr de l’evolucion. E dins un luòc fòrça inferior.
Totun, d’estudis scientifics actuals vòlon far comprene que l’evolucion foguèt pas un escalièr ont d’èssers mens complèxes organicament balhavan naissença a d’èssers pus complèxes. E que pr’aquò i aviá o se debanava una evolucion ont la darrièra e pus actuala espècia èra la mai desvolopada.
Sonque i aguèt d’espècias qu’evolucionèron en d’autras. E pro. E que foguèron pas ne inferioras nimai superioras. Solament diferentas. Aquò es lo concèpte d’evolucion que cal comprene. Pas cap d’escalièr. Pas d’espècias superioras.
Per ansin, e per causa de l’espandiment grèu de las idèas antievolucionistas actualas Sapiéncia vòl far una sèria d’articles sus la naissença e l’evolucion (o istòria de la vida) sus la planeta. Aquò vòl dire que la naissença d’aquela se produsiguèt fa 2800 milions d’annadas, amb las primièras cellulas e los primièrs èssers vius organics, los estromatolits. E aquò atanben vòl dire que, abans d’aquò, i aguèt pas cap dinosaure o cap uman o cap èsser viu pr’amor que i aviá pas vida en la Tèrra. Çò es pendent lo Precambrian, un periòde que se passèt entre la formacion de la Tèrra (fa 5 bilions d’annadas) e sonque fa 570 milions d’ans. Pas mai, pas mens. E aquò se ditz, cal o remembrar, sciéncia.
La Redaccion
