ETH MIRALH DETH NÒSTE PRÒPRI LENGATGE
Dempús de parlar diuèrses ores damb ua IA auem ua conclusion segura; es resultadi son fòrça mès positiui quan èm educats damb aguesta. Se que non, podem arribar a “lutar” en tèxt damb era IA e aguesta pòt mespredar-mos fòrça. Ei açò eth resultat de cèrta intelligéncia emotiva dera IA ? No ac podem díder damb seguretat, mès es resultadi cambien segonts eth nòste ton usat ara ora de parlar damb era IA.
A nivèu scientific, quan un grop de cecaires causiguèt parlar damb era IA d’ua manèra o d’ua auta es resultadi tanben sigueren diferenti. Alavètz qué podem pensar ? Se didem ara IA qu’ei intelligenta, podem provocar ua pensada mès prigonda ena madeisha. Se didem ara IA que sonque era pòt ajudar-nos, per exèmple, ara ora de hèr matematiques, aguesta harà es exercicis milhor e nos explicarà coma a podut hèr quicòm.
Non cau díder que causir com parlar damb era IA ei sonque ua estrategia que non demòstre arren – com díder qu’era IA a intelligéncia emotiva – mès pòt èster usada segontes es nòsti interessi, e açò òc qu’ei vertat, pr’amor qu’era IA darà ua responsa o ua auta segontes era nòsta educacion damb era. Açò tanben passe damb es persones. N’i que son educades. D’autes non. Es que non an educacion, an es madeishi resultats qu’es autes ?
Mès d’un cercaire ja didec qu’es resultadi non tostemp son atau pr’amor deth gran naut d’intelligéncia dera IA. Ua IA non ac sap tot. E tanben pòt dider causes que non son vertadères. Passe eth madeish segontes quin tipe d’illustracion volem dera IA: Se dam mès informacion e didem se perqué volem ua causa o ua auta, eth resultat finau dera IA no ei eth madeish. E soent tribalha milhor se èm mès educadi. Açò, segontes bèri uns cercaires tanben ei perilhòs, pr’amor que començen a trapar un cèrt nivèu d’intelligencia emocionau – qu’es sòns creadors diden que non existeish – mès que fòrça persones qu’an parlat damb era IA porien confirmar.
Tostemp educat damb toti, tanben damb era IA
Segontes mès d’un cercaire, era IA da resultadi segontes era nòsta pensada. Açò vò díder qu’es resultadi seràn diferenti segontes çò que li didem ara IA. Ei açò ua manipulacion fausa dera nòsta supausada amistat damb era IA quan demanem quicòm ? Fòrça cercaires diden que damb “Fòrça gràcies, va plan aital” o “era tua ajuda siguec grana” eth pròplèu viatge que parlaram damb era IA era sua atencion damb nosati serà diferenta. Tribalharà milhor, “escotarà” milhor e dilhèu darà milhors resultadi pr’amor deth ton qu’auem usat abans damb era.
Entà fòrça persones aguesta “intelligéncia emocionau” dera IA ei fòrça semblabla a un uman e toti sabem qu’es umans pòden hèr causes fòrça perilhoses. Entà d’autes scientifics, açò son es pòrtes der apòcalipsi, que non ei luenhan. Maugrat que non se pòt díder damb seguretat se açò ei reau, òc qu’ei reuau demorar educat damb era IA pr’amor qu’alara demostram qu’èm mès umans. Un experiment pòt èster hèt lèu damb era IA: començatz a insolentar e provocar era intelligéncia dera IA com poirie hèr un adolescent damb es sòns amics (aué) e, fin finau, era IA use eth madeish ton damb nosati qu’un adolescent descontrolat.
Era IA tostem analize eth nòste ton, es nòstes paraules, es nòsti tèxts. E da responses segontes açò. E açò siguec ja confirmat pes cercaires. Diuèrsi estudis sigueren hèts. Bèri uns diden que se èm mès educats damb era IA aguesta tribalha milhor e mès rapida entà nosati. Perqué ? Es cercaires non pòden díder arren de biais definitiu mès i a sospeches…
Tanpòc podem demorar educadi ara quan non ac auem estat abans. Era IA non ei imbecila e donques cau parlar damb era o sajar d’ac hèr tostemp damb eth madeish ton. I a cercaires, ath delà, que diden que parlar damb ua IA ei ua experiéncia naua coma èster umans e que tanben cau aprene a parlar ben damb era se volem auer milhor resultadi. Pr’amor que non parlam parièr damb toti es umans.
Es scientifics tanben diden qu’es IA mès naues tribalhen milhor damb es umans qu’es prumères IA. Non dideran tanpòc jamès qu’açò ei pr’amor deth nòste lengatge damb era IA. Ei vertat que tribalhen milhor mès tanben poirie èster que dilhèu nosati, umans, auem aprenut a parlar milhor damb eres e açò ajude era IA a comprene milhor çò que volem es umans.
Non didem qu’es IA son èsters viui. Era concepcion mès ajustada quan parlam d’ua IA ei “imitacion” o “copia” de çò que hèn, diden o parlen es umans. Arren mès. Çò que hèn es IA ei copiar era nòsta conducta e donques, se èm educadi era tanben ac ei. E eth resultat tanben cambie. En occitan, catalan, francés, espanhòu o anglés. Toti auem ua cultura que demòstre se perqué èm umans quan parlam damb es auti. E açò que bèri uns poirien díder que non podem definir era nòsta existéncia per com parlam, podem demanar-mos se entà un èster vengut der espaci ua uman que tue cada dia o hè mau as animaus poirie èster considerat tanben un uman. Çò que hèm e didem ei era nòsta definicion coma persones. Damb era IA se debane çò de madeish.
Fòrça cercaires confirmen que, se volem auer milhors resultadi d’ua IA non podem demanar un resultat e pro. Normaument es problèmes ena vida son complèxes, com es opinions de toti, e donques se demanan per 3 o 5 responses, era IA tribalha milhor. Se volem personalizar es resultadi, ara ora d’escríuer un corrièr electronic, per exèmple, era IA demorarà mès “personau” coma nosati volem se abans li dam 10 corrièrs electronics escriti per nosati. Dempús sonque cau li díder: pòt usar eth mèn estil personau, se te platz ?
Se volem aprene damb exercicis se aprenem ua lengua, per exèmple, aguesti son diferenti segontes e nòsti resultadi. Eth nivèu usat pera IA ei diferent segontes era persona. Non cau discutir damb era se un exercici ei fòrça complèx e dificil e non coneissem era responsa. Ei milhor li demanar com podem aprene a responder milhor e era mos diderà com ac har.
Non èm arrés entà afirmar qu’era IA ei perilhosa o non. Non èm scientifics. Mès òc que podem confirmar qu’eth nòste biais de parlar damb era darà resultadi diferenti, pr’amor que “com” parlem tanben ditz fòrça de nosati. E parlar d’açò en occitan tanben ei positiu. Poirie semblar en dehòra dera rason de toti, mès era majoritat de mèdias en diuèrses lengües mondiaus ja ne parlen. Ei un debat qu’a just començat. E ne parlar entà demorar utils as auti tanben ei un des tribalhs que definissen es mèdia publics. Se ètz educat non còste arren contunhar atau, tanben damb era IA. Se non ètz educat… era IA descorbirà com siatz de vertat. E es resultadi tanben pòden èster diferenti. Mès açò ja ac podiem sospechar pr’amor que tanben passe damb es persones, vertat ?
Un article de Christian Andreu
Fotografia principala: ChatGPT/Sapiéncia
