DE DIOXID DE CARBÒNI TRANSFORMAT EN CARBURANT NÈUTRE
Una còla de cercaires coreans a pogut crear un catalisador de coire de bassa temperatura que pòt convertir lo CO2 en combustible net d’un biais rapid e economic. Lo catalisador tresmuda lo CO2 en compausants de combustible amb una eficiéncia e una velocitat recòrd.
Segon divèrsas agéncias internacionalas, lo novèl catalisador de coire-magnèsi-fèrre transforma lo CO2 en CO a de temperaturas bassas amb una eficiéncia totala. Aquesta descobèrta dobrís lo camin a una produccion abordabla de combustibles sintetics nèutres en carbòni.
La còla, dirigida per Kee Young Koo, del departament de recèrca sus l’idrogèn de l’Institut de Recèrca Energetica de Corèa, a creat un catalisador de portada mondiala capable de transformar lo dioxid de carbòni, un gas d’efièch de sarra màger, en un ingredient essencial per produire d’ecocombustibles.
La reaccion de gas d’aiga invèrsa (RWGS) es un procès quimic que tresmuda lo dioxid de carbòni (CO2) en monoxid de carbòni (CO) e en aiga (H2O) en lo fasent reagir amb d’idrogèn (H2) dins un reactor. Lo CO2 resultant pòt èsser combinat amb d’idrogèn per far de gas syngas, clau per produire de combustible sintetic coma l’e-combustible o lo metanòl. Pels cercaires, la descobèrta es un camin nòu prometeire per l’energia sostenibla.
En defòra dels catalisadors actuals
Fins ara, la reaccion RWGS se desvolopa melhor amb de temperaturas superioras als 800ºC. Son en niquèl per suportar la calor, mas amb lo temps pèrdon d’eficiéncia. O far amb mens de temperatura pòt resòlver lo problèma mas tanben ne provòca d’autres coma la creacion de metan.
Ara los cercaires an cercat de catalisadors que pòdon demorar plan actius amb una mendre temperatura. Aquesta còla ne poguèt desvolopar un que podiá trabalhar plan amb sonque 400ºC. Aqueste nòu catalisador d’oxid mesclat de coire-magnèsi-fèrre produguèt 1,7 còps mai de monoxid de carbòni a 400ºC.
En mai d’aquò, los cercaires incorporèron una estructura de doble idroxid (LDH) per afinar lo meteis procès. Apondre de fèrre e de magnèsi tanben ajudèt fòrça a emplenar los traucs que demoravan entre las particulas de coire e a melhorar la resisténcia a la calor. Lo catalisador nòu produtz de monoxid de carbòni sens passar a travèrs de cap compausant intermediari.
“La tecnologia de catalisador d’idrogenacion de CO2 de bassa temperatura es una realizacion revolucionària que permet la produccion eficienta de monoxid de carbòni en utilizant de metals economics e abondoses,” çò diguèt Kee Young Koo. “Pòt èsser aplicat dirèctament a la produccion de matèrias primièras clau per de combustibles sintetics sostenibles. Contunharem la recèrca per contribuir a la neutralitat del carbòni e a la comercializacion de tecnologias de combustibles sintetics sostenibles ». La recèrca foguèt publicada dins lo numeric Applied Catalysis B.Enviromental and Energy.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
Fotografia principala: Lav Ulv/CC Search
