ES AUSTRALOPITECUS NON MINJAUEN CARN REGULARAMENT
Australopitecus auec ua dièta fòrça diuèrsa mèrs tanben fòrça basada enes vegetaus segontes una nàua analisi d’isotòps de set espècies ominines que viuèren ara hè 3,5 milions d’annades en Sterkfontein, en Africa deth Sud. “Es dents son era part mès dura deth corps des mamifèrs e pòt preservar ben era dièta d’un animal pendent milions d’ans”, çò didec Tina Lüdecke, ua cercaira dera universitat de Witwatersrand.
“Quan es animaus mingen, es reaccions bioquimiques provòquen era creacion d’isotòps de nitrogèn leugèrs (14N). Atau, es productes produsits peth corps demòren degradats e an un naut nivèu de 14N, çò dideren es cercaires. Aguestes quantitats de nitrogèn leugèr que gessen en dehòra deth corps en forma d’urina, femses o sudor provòquen eth creishement de nitrogèn pesat (15N).”
Açò vò díder qu’es erbivòrs an un nivèu de nitrogèn pesat major qu’es plantes que mingen e es carnivòrs tanben an un nivèu de nitrogèn pesat major qu’eth des animaus que caçen. Atau quan mès grana ei era quantitat de 15N restacat damb eth 14N, mès en naut dera cadena trofica ei. Es isotòps hè temps que son usadi entà estudiar era dièta des animaus modèrns e des umans.
Totun, en estudi de materiau fossil es mòstres solament auien qualcunes milèrs d’annades e pro, pr’amor dera degradacion der organisme pendent eth temps. Ara, en un nàu estudi eth doctor Lüdecke e ua còla de cercaires usèren ua nàua tecnica entà mesurar es nivèus d’isotòps de nitrogèn fossilizadi enes dents damb milions d’annades d’edat.
Ua nàua tecnica
Es cercaires trapèren qu’es nivèus d’isotòps de nitrogèn enes dents d’Australopithecus èren diuèrses mès èren fòrça baishes restacades damb es dents d’auti erbivòrs. E plan mès baishes qu’es nivèus des carnivòrs actuaus. Atau pensèren qu’era dièta ominina siguec fòrça diuèrsa mès qu’ère basada ena vegetacion.
Atau, es australopitecides non caçauen regularament grani mamifèrs, com hèc Neandertal milions d’annades dempús. Es cercaires, totun, non escarten era possibilitat d’un consum ocasionau de proteïnes animaus com uèus o termits, mès volèren soslinhar qu’era sua dièta siguec mès que mès vegetariana.
“Açò ajudarà fòrça a compréner melhor era evolucion umana e poirie ajudar tanben a respóner qüestions clau e ua d’eres ei quan comencèren es nòsti ancessors a minjar carn, çò didec Alfredo Martínez-García der Institut Max Planck de Quimia, e com provoquèc açò eth creishement deth sòn cervèth “.
Segontes es cercaires er estudi ajudarà a compréner melhor era dièta des nòsti ancessors pendent milions d’annades e demòstre que non siguec carnivòra en aquera epòca. Er estudi siguec publicat ena revista scientifica internacionau Science.
Era Redaccion
