LA FAMILHA DELS BRAQUIOSAURIDES
Lo genre dels braquisaurides es la confirmacion de tot çò que foguèt en defòra de las mesuras abitualas dels dinosaures, malgrat que tanben foguèron dinosaures. Cèrts òsses d’aquestes animals foguèron encara màgers qu’un òme. E, malgrat aquò, se pòt pas dire que foguèron los dinosaures pus longs d’aquela epòca. Pasmens, quiòc que se pòt dire que foguèron los pus nauts e tanben los pus pesants. Pas jamai cap animal terrestre foguèt tan naut o pesant.
Braquiosaurus, lo dinosaure que balhèt lo nòm a tot lo genre, aguèt las pautas anterioras màgers que las posterioras. Aquò èra brica abitual en mond dels dinosaures. Aguèt un cuòl tras que long, coma las girafas actualas. Lo cap doncas, demorava a mai de 13 mètres de nautor del sòl. Los òsses d’aqueste dinosaure foguèron trobats en Africa, America del nòrd e Euròpa. L’esqueleta mai entièra foguèt trapada en Africa de l’èst e fasiá 22,50 m de longor e 12 m de nautor. Foguèt lo pus naut dinosaure de la planeta.
Un genre especializat
Los braquiosaurides se noirissián de fuèlhas d’arbres. Los traucs nasals del cran èran màgers que las orbitas de l’animal. Una particularitat importanta es qu’avián los òsses metacarpians (los de las pautas anterioras) mai longs encara que los de los diplodocides. Un dinosaure d’aqueste genre foguèt Camasaurus, qu’aguèt un cran massís mas tanben un mòrre plan. Sauroposeidon, per contra, foguèt un dels màgers braquiosaurides jamai coneguts. Se pensa qu’arribèt als 30 mètres de longor e que pesava 50 tònas. Demorèt en America ara fa 105 milions d’ans.
Uèi los cercaires creson que lo grop dels braqquiosaurides e los dels titanosaurides foguèron familha pròcha, pr’amor que los segonds podián aver coma ancessors los primièrs. Siá com siá, los titanosaurides apareguèron pendent la fin del Jurassic. Foguèron d’animals comuns en America del sud, fins al cretacèu malgrat que tanben n’i aguèt en Índia, Madagascar o Euròpa.
Los paleontològs creson qu’avián los costats protegits per de placas d’òs. En Argentina foguèt trobat un luòc ont daissavan los uòus. Una d’aquestas espècias foguèt Argentinosaurus, que demorèt tanben fa 105 milions d’ans. Pesava 100 tònas e aviá una longor de 35 mètres. Benlèu foguèt l’animal terrèstre pus pesant de tota l’istòria de la Tèrra.
Mas pas totes los dinosaures branquiosaurides o titanosaurides foguèron gigants. I a espècias plan pichonas e curiosas amb de mesuras nanas. Que benlèu demoravan en d’illas. Una d’aquestas foguèt Rapetosaurus, un gigant de Madagascar descobèrt en 2001. Çò qu’es plan particular de Rapetosaurus es que sonque fasiá 8,5 mètres de longor. L’espècia demorèt en aquela illa fa 70 milions d’ans, quan aquesta ja èra desseparada d’Africa.
Ampelosurus, per contra, lo nomenat “reptil de la vinha” foguèt trobat en Occitània, prèp de Campanha d’Aude, e es considerat coma un pichon titanosauride pr’amor que sonque arribava als 15 mètres de longor.
Encara uèi las mesuras dels dinosaures de la familha dels braquiosaurides son polemicas en çò dels paleontològs. Per mesurar çò que mesurava realament Branquiosaurus,los cercaires realizèron divèrses estudis. Luenh de finir la polemica, los pus recents estudis balhan de mesuras plan desparièras. Per ansin, se per qualcunes paleontològs los braquiosaures arribèron a pesar fins a 32 tònas, d’autres encara afirman que poguèt pesar plan 78 tònas. Aital, las siás gigantassas mesuras encara son pas definitivas pr’amor que i poiriá aver qualcuna suspresa de darrièra ora.
La Redaccion
Imatge principau: Braquiosaurus Sapiéncia/ChatGPT
