DE VIDA SUS VÈNUS ?
Justament ara la sciéncia s’avisa que benlèu i poiriá aver de vida sus Vènus. Segon un nòu estudi fach per de cercaires estatsunidencs, las nívols d’aquela planeta serián plenas de microorganismes qu’aurián fugit la nauta temperatura de la superfícia. Pasmens, cal trapar mai de pròvas per demostrar aquesta ipotèsi que, pasmens, a dobèrta una nòva discussion dins la comunautat scientifica mondiala sus ont cal cercar de vida fòra de la Planeta Blava.
L’estudi foguèt realizat per mai d’un cercaire de l’Universitat Politecnica Estatala de Califòrnia, dont Rakesh Mogul. Segon de donadas ara estudiadas tornarmai, pr’amor qu’èran pas nòvas, de milions de microorganimes emplenarián la superfícia de Venus dempuèi fa milions d’annadas e serián la pròva mai pròcha de vida sus d’autras planetas.
De remembrar que Vènus es la segonda planeta del Sistèma Solar mai pròcha del Solelh e qu’a una atmosfèra plan cauda que pòt aténher los 500ºC. I a pas d’aiga liquida e fins a uèi totes cresian que i aviá pas de vida. Pasmens, una nòva descobèrta qu’aguèt luòc en 2020 confirmèt que dins son atmosfèra i aviá de fosfina, una sòrta de gas solament producha per de micròbis.
Aital, l’estudi, publicat dins lo numeric Geophysical Research Letters, a confirmadas las donadas de l’estudi anterior e, en tot estudiar d’un biais pus prigond aquelas donadas, a tanben afirmat que dins l’atmosfèra de Vènus i aviá pas solament de fosfina mas d’autres elements plan importants del ponch de vista biologic. Las donadas serián las que recebèt la Tèrra de la sonda Pioneer Venus, enviada sus aquela planeta en 1978. Segon aquelas donadas, dins las nívols de Vènus i auriá de fosfina mas tanben de sulfur d’idrogèn, d’acid nitrós e d’acid nitric, de cianur d’idrogèn, de monoxid de carbòni, d’etan, d’amoniac e d’acid clorós.
De fotosintèsi anoxigenica
La conclusion pels cercaires es clara: dins las nívols de Vènus i a encara d’elements quimics non descobèrts e dins lo meteis airal i a de microorganismes vius. De compausants clau per la fotosintèsi anoxigenica serián importants en aquela atmosfèra. Es lo procés utilizat pels microorganismes per, en tot aprofechar la lutz solara, produire d’energia quimica e créisser. A mai, tanben s’es pogut confirmar que dins l’atmosfèra venusiana s’i desvolopava lo cicle del nitrogèn. Mas çò de pus important seriá que i aurián de cellulas vivas que poirián produire d’energia sens oxigèn.
Per ara, aqueste estudi ajudarà a comprene melhor çò que ja dison maites scientifics: que sus Vènus, fa de miliards d’ans, i aviá una atmosfèra plan semblabla a la de la Tèrra, e que tanben i aguèt de mars e oceans. Mas semblariá que, fa un miliard d’ans, aguèt luòc una catastròfa e la temperatura de Venus montèt fins als 450ºC e una pression atmosferica de 90 bars (la meteissa que i a en mar a un quilomètre jos la superfícia de l’ocean). Mas plusors microorganismes aurián fugit vèrs la nauta atmosfèra de Vènus (las donadas foguèron trobadas a 41 km d’altitud). Cossí que siá, s’aquò foguèsse demostrat, demorariá segur que l’òme cèrca la vida fòra de la Tèrra e plan luènh, e benlèu i a de vida en de luòcs fòrça mai pròches de la Planeta Blava, coma Vènus.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
