LA NASA VÒL TORNAR A VÈNUS
Benlèu pr’amor del nòu estudi publicat fa gaire sus la preséncia de bacterias e microorganismes en la troposfèra de la planeta Vènus, que l’agencia espaciala estatsunitenca, la NASA decidiguèt tornar a Vènus abans de la fin d’aquesta decada. L’anonci foguèt fach public justament aprés la publicacion d’aquel estudi, qu’analizava de donadas de las darrièras missions estatsunitencas en aquela planeta pendent 1990.
Aital, la NASA estariá premanint doas nòvas missions a Vènus pels ans 2028 e 2030. La tòca seriá una analisi pus prigonda de l’atmosfèra d’aquela planeta per veire s’es vertat que i auriá de vida microscopica dins la part superiora de l’atmosfèra venusiana. A mai, tanben vòl conéisser lo passat geologic d’aquela planeta per assajar de comprene quina foguèt l’evolucion de la planeta, uèi tant diferenta de la Tèrra (la siá superfícia pòt arribar plan als 500º).
Mai de 500 milions de dòlars foguèron destinats a aquestas doas missions espacialas. Segon Bill Nelson, administrador de la NASA “es una escasença unica per estudiar aquela planeta qu’avèm pas visitat pendent los darrièrs 30 ans (los estatsunitencs)”. De remembrar que lo darrièr còp qu’una nau espaciala estatsunitenca foguèt enviada a Vènus se passèt en 1990 amb la sonda Magellan. Pasmens, l’Agencia espaciala europèa e la japonesa òc visitèron Vènus aprés.
Segon la NASA lo potencial scientific de Vènus es ara estonant e pòt far cambiar los plans pel futur de las missions de la NASA. Las missions, totun, seràn pas aisidas car Vènus a una superfícia òrra e la temperatura de la planeta es tras que nauta. Las missions seràn nomenadas Davinci+, que vòl estudiar la composicion de l’atmosfèra de Vènus e cossí aquesta evolucinèt, e assajar de confirmar se Vènus aguèt jamai un ocean.
La segonda mission, Veritas, auriá coma tòca far una mapa de la superfícia de la planeta per comprene la siá istòria geologica d’un biais prigond. Per aquò far cal trapar totas las possiblas montanhas e volcans que Vènus poiriá aver. Mas per coneísser la resulta d’aquelas doas missions cal ara esperar, aumens, fins a l’an 2028.
La Redaccion
