Danemarc descorbic ua naua mutacion dera varianta dera COVID-19 coneishuda com Omicron. Aquesta mutacion a era capacitat d’arrestar era destruccion des cellules malautes e poirie èster ua naua version dera malautia fòrça mès perilhosa qu’era madeisha Omicron. Eth nòm d’aguesta naua varianta dera COVID-19 qu’ei BA.2 H78Y e es cercaires confirmèren que ja ei en mès de 24 % des casi de COVID en aqueth país europèu.
Atau, es cercaires que descorbiren aguesta naua varianta confirmèren que pòt auer era capacitat d’arrestar es cellules malautes e donques se non pòden èster destrusides sonque pòden multiplicar-se entà créisher encara mès. Eth descorbiment passèc pr’amor qu’eth virus dera COVID-19 ei un des mès estudiats aué dera planeta e pr’açò es mutacions deth virus son lèu trapades e identificades.
A mès d’açò es scientifics tanben confirmèren qu’aguesta mutacion creishec mès d’un 10% en mens de quate setmanes, çò que tanben ei perilhós. Atau poirie èster era responsabla dera arribada damb fòrça dera COVID un aute còp pendent er ivèrn de 2022 o dilhèu abans e tot. Aguesta naua mutacion se produsís pr’amor dera apopsi des cellules (ua mutacion ena proteïna ORF3A) que non foncione mès. Cau rebrembar qu’era apopsi ei era mòrt cellular produsida peth pròpri organisme uman pr’amor que i a cellules malautes que cau destrusir. Açò ei era manèra qu’a eth còs uman de lutar contra es cellules malautes e que son un perilh entath còs uman. E se eth virus trapèc ua naua forma d’arrestar era apopsi era malautia e eth camin totaument dubèrt entà espandir-se.
Ua mutacion fòrça perilhosa
Eth descorbiment d’aguesta mutacion naua d’Omicron siguec publicada ena revista online scientifica Journal of Medical Virology. Es cercaires qu’estudièren aguesta mutacion confirmèren que “pòt ben provocar cambiaments dera proteïna ORF3A e qu’açò ei fòrça perilhós pr’amor qu’atau demoren liures es viroporines e atau eth virus demore totaument liure entà espandir-se sense fin”. Segontes açò es malauts de COVID en futur poirien patir era malautia d’una manèra fòrça mès rapida e damb eth perilh que non poirien èster guarits.
A mès, e segontes un estudi hèt en junhsèga de 2021 era proteïna ORF3A ei associada damb era capacitat qu’a eth virus dera COVID entà espandir-se e pr’açò aguesta mutacion poirie dar naua fòrça entara malautia. Justament siguec eth ritme de velocitat de creishement dera COVID-19 damb aguesta mutacion çò que dèc ara comunautat scientifica era alarma pr’amor qu’era velocitat entà créisher d’aguesta mutacion ei susprenenta e fòrça nauta. Es cercaires danesi considèren qu’aguesta naua mutacion poirie èster donques fòrça mès perilhosa entàs umans que non era varianta Omicron, e que poirie èster fòrça mès grèva pr’amor qu’es vaccins poirien non foncionar damb era.
Era Redaccion
Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita
