Ja fa longtemps que la populacion mondiala d’abelhas perilha. Totes los mèdias ne parlan. Mas se sap pas perqué. Ara, una còla de recercaires de l’Universitat de York an publicat un nòu estudi scientific que ne balha una responsa. L’estudi es pas definitiu e es evident que i a tanben d’autras causas, mas la conclusion confirma lor mòrt prematura.
Segon aqueste estudi, las abelhas trabalhadoras mas tanben las reinas son fòrça expausadas als nauts nivèls de neonicotinoïdes, de pesticidas abitualament utilizats dins l’agricultura d’uèi lo jorn. L’estonament scientific es arribat quand an pogut confirmar qu’aquela exposicion ven pas dels camps desinfectats mas dels situats a lor entorn. Per ansin las abelhas morisson fòrça abans e los pesticidas meton en dangièr la santat de tota la colònia.
L’estudi es estat fach en tot estudiar de colònias d’abelhas de mèl dins la província canadiana d’Ontàrio e d’autres luòcs d’America del Nòrd. Ne caldriá ara far un estudi parièr al nivèl europèu. Totun, de confirmar que l’utilizacion de pesticidas amb neonicotinoïdes es estat e contunha d’èsser polemic. D’autres estudis an negat poder afirmar que los nivèls d’aquel pesticida èran pas reals. Qu’èran pas brica realistas.
Un estudi qu’a durat de setmanas
“Es un estudi qu’a durat longtemps, çò diguèt Amro Zayed, de l’Universitat York de las Sciéncias, a Toronto. Caliá far un estudi prigond e long per poder confirmar los scenaris mai reals sus la mòrt de las abelhas. E o avèm pogut determinar”.
Aital, l’estudi es estat fach sus cinc colònias desparièras d’abelhas que demoravan dins de territòris situats a l’entorn de camps de milh tractats amb de pesticidas. Estudièron la vida de las abelhas dempuèi lo mes de mai fins al de setembre. Aquestas patiguèron doncas una exposicion als nenicotinoïdes almens durant tres meses, çò es pendent la sason mai activa de las abelhas en America del Nòrd, coma o expliquèt Nadia Tsvetkov, de l’Universitat York.
E la suspresa arribèt quand foguèt confirmat que las abelhas patissián lo pesticida non pas dels camps desinfectats de milh o sòja mas del pollèn de las flors del territòri que i aviá a l’entorn d’aqueles camps en Ontàrio e Quebèc. “Es un pesticida soluble dins l’aiga e arriba dins l’environament dels camps d’agricultura tractats amb de pesticidas”, çò soslinhèt Tsvetkov. A mai, los cercaires an pogut doncas confirmar que las abelhas qu’avián manjat de pollèn de flors a l’entorn d’aqueles camps morissián mai lèu.
“Las abelhas trabalhadoras qu’avián agut contacte pendent los primièrs 9 jorns de vida amb aquelas flors morissián abans. Fins a un 23% abans, çò diguèt Tsvetkov. Las colònias expausadas perdián la reina e la colònia demorava sens cap d’igièna”.
Otra aquò, los scientifics an descobèrt que l’exposicion a de pesticidas coma los nenicotinoïdes mesclats amb un fungicida fasiá venir lo pesticida encara mai dangierós e mortal per las colònias d’abelhas.
“La combinason de neonicotinoïdes amb lo fungicida empejorava la situacion, çò assolidèt Valérie Founier, de l’Universitat Laval de Quebèc. La mescla d’aqueles dos produches provocava fins a dos còps mai de mortalitat entre las abelhas”.
La Redaccion
Aqueste article serà tanben publicat dins Jornalet , lo primièr quotidian en linha de lenga occitana, amb lo qual Sapiéncia a un acòrdi de cooperacion.
