Manjar de mangos (mangifera indica) a cèrts beneficis per la santat. Entre aquestes melhorar la pression en sang e un mai grand contraròtle de lo sucre en aquesta. Es una frucha que redusís lo risc general de desòrdres metabolics e inflamacion cronica. Aital o soslinhan divèrses estudis fachs ara e publicats al jornal FASEB.
Qualques dels darrièrs estudis son estats realizats per de scientifics de las universitats estatunidencas de Texas A&M e d’Oklahoma. En un d’eles foguèt estudiada l’absorcion, metabollisme e excrecion d’acid gallic, glicosidas e gallotannidas en qualqu’uns individús grasses e tanben magres qu’avián manjat mai de 400 gr de mango fresc pendent sièis setmanas. Las resultas foguèron susprenentas pr’amor que “manjar mango pendent cèrt temps fa créisser los beneficis per la santat, sutot a nivèl antiinflamatòri – çò diguèt Susanne Martens-Talcott, del Departament de Nutricion de l’Universitat de Texas A&M”.
Una frucha amb desparièras proprietats
De mai, la meteissa còla d’aquesta universitat texana, dirigida per Hyemee Kim ja aviá fach abans un autre estudi sus lo mango. E concluguèron que balhava de beneficis per la santat sus la populacion de micròbis bons qu’a l’èsser uman, una melhor capacitat biologica del metabolisme e un contraròtle mai grand de las activitats antiinflamatòrias en los individús estudiats.
Al delà, un autre estudi dirigit per Chuo Fang estudièt los efectes qu’a lo mango sus lo metabolisme uman après manjar prèp de miei quilogram d’aquesta frucha pendent sièis setmanas e poguèren confirmar que l’Indèx de Massa Corporala en los individus se redusiá plan. “Manjar aquesta frucha baissa la pression en sang dels individús estudiats – çò soslinhèron los recercaires – e ajuda las personas grassas en tot mantiéner l’omeostasi de la glucòsa a long tèrme”.
D’un autre biais, los scientifics an volgut demostrar qu’aquesta frucha tropicala a un potencial terapeutic fòrça grand, sustot en la prevencion e tractament de l’obesitat e tanben en d’autres desòrdres metabolics. Totun, tanben an reconegut qu’ara cal far d’estudis mai prigonds per confirmar las bonas donadas a travèrs d’un grand estudi a nivèl clinic. Malgrat los efèctes moderats – çò diguèt Crystal O’hara, de l’Universitat d’Oklahoma – manjar mai d’un quart de quilogram cada jorn de mango a de beneficis clars per la santat umana”.
La Redaccion
