La question de cossí tornar scientificament la memòria a una mirga poiriá semblar d’èsser sens cap d’importància pels umans. Mas un còp d’uèlh mai prigond mandat a aquela question poiriá restacar la responsa a l’escasença nòva qu’i poiriá aver se la sciéncia ditz que poiriá menar a ajudar a tornar tanben la memòria als umans. E aquò, sens dobte, es tras qu’important per totes.
Car aquò es çò qu’a agut luòc après la confirmacion de la descobèrta de part d’una còla de cercaires qu’estudiavan cossí restituir la memòria a una mirga. Se poiriá desvolopar lèu, doncas, un tractament tanben per ajudar los umans a recobrar la memòria. Un prètzfach fantastic pr’amor dels milièrs e milièrs d’umans que patisson amb l’edat una pèrda de memòria cada annada.
La tròba se faguèt dins las universitats de Cambridge e Leeds. Ailà una còla de cercaires trapèt cossí permetre a de mirgas de tornar accedir a lor memòria d’abans. L’estudi es publicat dins numeric Molecular Psychiatry e poiriá èsser revolucionari: l’usatge de tractaments genetics pòt restituir la memòria als mamifèrs.
D’efièch, los cercaires an descobèrt que los rets perineuronals del cervèl uman venon totjorn que mens elastics amb l’edat. Es aquò que provòca la pèrda de memòria pels umans. Pasmens, l’estonament dels scientifics arribèt quand foguèt descobèrt que, en tot restaurar los nivèls de qualques unes dels compausants d’aquelas rets perineuronals, la memòria torna a de nivèls anteriors als que l’animal aviá abans la pèrda d’elasticitat cerebrala.
De manipulacion genetica
Per o obténer, los cercaires introduguèron un virus dins de mirgas e verifiquèron que los pichonèls animals recobravan la meteissa memòria qu’abans e quand èran mai joves. “Amb aquel tractament las mirgas pus vièlhas an pogut recobrar la memòria d’un biais estonant, çò confirmèt Jessica Kwok, de l’Universitat de Leeds. E cresèm que lo meteis mecanisme pòt èsser eficaç amb d’umans, e doncas, se poiriá trapar lèu la solucion per garir totas las personas d’edat avançadas que patisson una pèrda de memòria”. L’estudi a obtengut la collaboracion del Centre de Recèrca per la malautiá d’Alzheimer del Reialme Unit, en mai de la del Conselh de Recèrca Europèu.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
