L’ecosistèma de Serengeti-Mara es un dels mai grands e bèls airals protegits de la planeta. S’espandís sus mai de 40 000 km2 dins lo Pargue Nacional del Serengeti e la Resèrva Nacionala Maasai Mara en Africa de l’Èst. Cada an, mai d’un milion de gnos, de miei milion de gasèlas e 20 000 zèbras lo travèrsan en cèrca d’aiga e d’èrba. Mas de scientifics avisan que la pression umana comença d’èsser perilhosa.
Segon de cercaires d’una còla internacional qu’an fach ongan un nòu estudi après l’analisi de donadas de pus de 40 ans, l’ecosistèma del Serengeti es jos una pression de mai en mai granda. Demandan que se torne pensar cossí manejar las frontièras d’aquel luòc pr’amor que la pression umana poiriá lèu arribar al centre d’aquel ecosistèma.
La conclusion arribèt après la descobèrta que l’activitat umana prèp de las frontièras del Serengeti-Mara provocava ja un efièch clar sus de plantas, d’animals e de tèrras d’aquel airal. Segon los scientifics autors d’aquel nòu estudi, doncas, i a d’airals frontalièrs del Serengeti-Mara qu’an ja patit fins a un 400% de creissença de la populacion umana e aquò solament pendent los darrièrs dètz ans. D’un autre costat, tanben soslinhan que i a d’espècias salvatjas d’autras zònas kenyanas que ja an patit un declin de mai d’un 75% mas pas encara al Serengeti-Mara. E pr’aquò avisan que lo futur de l’airal es pas segur.
L’estudi confirmèt d’efièch que l’airal aviá ja patit una creissença gigantassa de populacion e que l’elevatge dins las divèrsas zònas del luòc entraïnava ja de problèmas environamentals sus de gnos, de zèbras e de gasèlas perque lor cal mai de temps per trobar de bona èrba. Fòrça mai de temps que ne necessitavan abans. En mai d’aquò, i a fòrça mens de fuòcs naturals e la vegetacion a tanplan cambiat. Tot aquò a cambiat l’environament dels airals frontalièrs primièr e ara ja es prèp d’arribar al còr de la region.
La cadena alimentària es afectada
Segon aquel estudi, tot aquò a ja provocat de problèmas dins la cadena alimentària pr’amor que l’èrba conten pas tantes nutriments e la relacion entre las plantas e los microorganismes a totalament cambiat. Aquò aflaquís e fragiliza un ecosistèma que pòt èsser en perilh se i a una secada importanta o encara d’autres cambiaments environamentals pr’amor del cambiament climatic.
Los scientifics soslinhèron tanben que d’airals protegits coma lo Serengeti-Mara avián besonh d’alternativas estrategicas se se voliá manténer una bona coexisténcia entre fauna e umans. Segon eles, l’estrategia actuala de refortir las frontièras es un risc màger per las comunautats localas d’animals e d’umans.
L’estudi es estat fach per divèrsas universitats de la planeta coma l’Universitat de Groningen (Païses Basses) que trabalhèt amb fins a 11 universitats coma las de York, Glasgow e Liverpool. Segon Colin Becla, de l’Universitat de York, las zònas protegidas d’Africa de l’èst son uèi lo jorn jos una pression umana plan seriosa en causa del cambiament climatic, de braconaires e la de creissença naturala de la populacion umana.
Ça que la, un autre cercaire que participèt en aquel estudi, Michiel Veldhuis, de l’Universitat de Groningen, confirmèt que “la necessitat de tornar pensar cossí protegir aqueles airals amb de frontièras es un desfís per l’avenidor se volèm conservar la biodiversitat coma es ara encara”. D’un autre costat, Simon Mduma, director de l’Institut de Recerca Salvatja del govèrn kenyan, afirma que “la resulta d’aquel estudi arriba al bon moment perque ara lo govèrn kenyan vòl far de nòus passes per melhorar aqueles luòcs en Kenya. La populacion umana quicha de mai en mai l’ecosistèma del Serengeti-Mara, çò diguèt Mduma, e aquò es çò qu’an de besonh los politics per far de politica”.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
