A còps tanben va plan conéisher qu’ei çò que hèn los país vesins entà véder com nse podem tanben melhorar l’estat de la natura a nòste. Que disem aquò pr’amor que, pas luenh d’Occitània, dens un aute país europèu, lo governament locau que declarè l’estat d’emergéncia naturau entà avisar que cau reservar mei de territòri a la natura si’s la vòu sauvar lèu.
La situacion que comencè ne hè pas guaire, quan los membres deu Conselh deu Districte deus Paluns de Staffordshire, aprés examinar dab pregondor l’estat de la region, que causín declarar l’estat d’emergéncia naturau. La decision qu’arribè la setmana darrèra, e qu’ei lo prumèr còp qu’ua administracion anglesa demanda declarar l’estat d’emergéncia naturau dens aqueth país. Ua tasca que pòt, tanben viéner, istorica.
L’estat d’emergéncia naturau de las Paluns de Staffordshire qu’a coma tòca poder identificar, classar e declarar dinc au 30 % deu territòri coma estenuda naturau protegida entà ensajar de protegir mélher la fauna e la flòra locaus. Totun, qu’ei ua tòca que pòt arribar a vàder reau dens l’an 2030, que cau tot aquerò har en solament sieis annadas.
Un greù declin naturau
Los membres d’aqueth conselh que declarèn que la natura locau avèva patit un grèu declin las darrèras annadas e, sustot, despuish la decada de 1970. E donc, que calèva har quauquarren, si’s volèva sauvar la natura deu lòc. Los membres deu conselh qu’afirmèn que “i avèva hèra lòcs on la situacion èra plan prauba”.
La conselhèra Linda Malyon ditz que “cau acolhir aquera declaracion dab los braç obèrts e enter tots ensajar de balhar ua auta escadença a la natura. Si que non, ce ajustè, l’estat de la natura ne serà pas lo medish que coneisheràn los nostes hilhs. Per açò la declaracion qu’èra un afar juste.
Justament, dens aquera medisha region, a las Paluns de Staffordshire, que i avó dejà en 2019 ua declaracion d’emergéncia climatica. E, segon los membres d’aqueth conselh, las duas declaracions que son plan restacadas. Entau conselhèr Nigel Yates, qu’estúdia lo cambiament climatic a la region, aquera declaracion qu’ei la pèça finau que calèva entà poder sauvar l’environament.
Un aute conselhèr, Mike Gledhill, tanben confirmè que la declaracion hasèva besonh si’s volèva pressionar las administracions màgers, com l’estatau, entà ajudar a sauvar la natura locau. “Que hèm çò que podem, dit lo conselhièr. E nosauts solament podem aquò har. Se volem sauvar de vertat la natura deu lòc, que son, totun, autas administracions dab competéncias las qui ac pòden har. Mes shens aquera declaracion d’emergéncia naturau locau n’i auré pas arren a har. E qu’ei obrir ua escadença entà poder tribalhar tots amassa e sauvar çò que demora enqüèra de la fauna e la flora deu lòc.
La Redaccion
Aguesta cronica a Ràdio país : https://soundcloud.com/radio-pais/natura-lemergencia-naturau?in=radio-pais/sets/natura
