Home SCIÉNCIA VÈNUS POIRIÁ CONTÉNER DE MICROORGANISMES
VÈNUS POIRIÁ CONTÉNER DE MICROORGANISMES
0

VÈNUS POIRIÁ CONTÉNER DE MICROORGANISMES

0

E òc. E de microorganismes resistents a l’acid. Es la resulta d’una nòva ipotèsi publicada dins la revista Astrobiology per una còla scientifica amb Sanjay Limaye coma cap. Segon aquesta, sus la planeta i a de nívols nauts –entre 47 e 50 quilomètres d’altitud– que poirián conténer de micròbis pr’amor d’una pression moderada (una atmosfèra) e de fòrça bonas temperaturas (60º C) en mai de la preséncia d’aerosòls d’acid sulfuric.

La còla de recercaires confirmèt que sus Vènus s’es trobat de particulas qu’an las meteissas dimensions que sus la Tèrra.

Es coma un retorn a las originas de la recèrca de vida extraterrèstra dins nòstre sistèma solar. Aquela nòva ipotèsi afirma que cal pas anar luènh per la descobrir. E arriba après una recèrca prigonda sus de planetas coma Mart o de lunas coma Euròpa, Ganimèdes o Callisto. Segon aquela còla de l’Universitat de Wisconsin, la vida se tròba fòrça mai prèp.

“Vènus a agut fòrça temps per desvolopar de vida. Mai d’un modèl suggerís que la planeta beneficièt d’un bon clima fa de temps, en mai d’aiga liquida –çò diguèt Limaye– e aquò pendent mai de 2 miliards d’annadas. Es fòrça mai longtemps que non pas Mart. E per tant cal far una recèrca mai prigonda sus aquela planeta”.

A mai, los scientifics an confirmat que sus la quita Tèrra i a de microorganismes a mai de 45 quilomètres de naut dins l’atmosfèra. Aquò vòl dire que pòdon demorar dins de condicions acidas. Lor alimentacion es a basa de dioxid de carbòni e produson d’acid sulfuric, un fach confirmat per de cercaires de la NASA.

La possibilitat que los nívols de Vènus contengan de vida ja foguèt afirmada en 1967 pel biofisician Harold Morowitz e l’astronòm Carl Sagan. Ara una còla scientifica amb David Grinspoon e Mark Bullock a volgut far aquela ipotèsi. Aital entre 1962 e 1978 foguèron faches divèrses estudis que volián confirmar s’ailà i aviá de vida. Totun, las condicions de la superfícia (450º C) laissèron veire que Vènus èra una planeta plan inospitalièra.

De particulas son estadas trobadas

Malgrat tot aquò, la còla de recercaires qu’a realizat aquel estudi confirmèt que sus Vènus s’es trobat de particulas qu’an las meteissas dimensions que sus la Tèrra e que sus nòstre planeta pòrtan de bacterias. Totun, los espleches scientifics utilizats permeton pas de saber se son de matèrias organicas o non.

Lo VAMP poiriá demorar prèp d’un an sus Vènus per i culhir de donadas.

Es per aquò que defendon l’idèa d’i enviar una sòrta de fusada, lo VAMP (Venus Atmospheric Maneuverable Platform) que i pòt arribar en tot volar a travèrs de son atmosfèra per l’explorar. Segon Limaye, lo VAMP poiriá demorar prèp d’un an sus Vènus per i culhir de donadas. “Es una plataforma scientifica que pòt téner d’instruments coma divèrses espectromètres, de sensors quimics e meteorologics”, çò diguèt Limaye.

Segon aqueles scientifics, l’ipotèsi qu’afirma que los nívols de Vènus contenon de microorganismes pòt èsser confirmada sonque se i mandan una plataforma d’aquel tipe. Segon un dels scientifics, Rakesh Mogul, Vènus poiriá èsser un nòu capítol dins l’exploracion astrobiologica de l’umanitat. Una idèa interessanta que benlèu cal confirmar. Per ansin es la sciéncia.

La Redaccion

Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.

Christian Andreu Nasquèt a Barcelona en 1972, estudièt jornalisme a l’Universitat Autonòma de Barcelona e son especialitat es la politica internacionala. Parla uech lengas dont l'occitan. A publicat lo libre Art i Lletres a Horta-Guinardó e a collaborat totjorn amb de jornals catalans, bascos e occitans coma La Veu del carrer, El Punt, Egin, A vòste e Jornalet. Es maridat, a dos enfants, Jana e Roger, e demòra a Reus.