De notícias sus de medicaments que pòdon guarir la malautiá de l’Alzheimer son a l’ora d’ara de mai en mai presents. Ara arriba una nòva sensacionala: una còla de biològs poguèt crear una mescla de drògas que convertís de cellulas vesinas a de neurònas qu’an patit damatge en de nòvas neurònas, çò que poiriá lèu lèu èsser lo capítol final dins la lucha contra aquela malautiá cerebrala.
La dròga poiriá èsser utilizada per luchar contra de malautiás cerebralas coma l’Alzheimer e encara d’autras lesions del cervèl uman. Per i arribar de biològs de l’Universitat Penn trobèron un grop de quatre, e ne poirián èsser fins a tres, moleculas, que convertisson de cellulas vesinas a de neurònas qu’an patit un dan, en de nòvas neurònas, çò qu’es un dels sauts mai importants dins la lucha medicala contra aquel biais de malautiás.
“Lo problèma mai grand per guarir lo cervèl es que las neurònas qu’an patit un dan se regeneran pas pr’amor que se dividisson pas, çò diguèt Gong Chen, cap de l’estudi que trapèt aquela nòva dròga. Per contra, las cellulas que i a al torn d’aquelas neurònas pòdon créisser quora lo cervèl patiguèt un dan. E amb aquela dròga avèm trobat lo melhor sistèma per convertir aquelas cellulas al torn de neurònas mòrtas en de nòvas neurònas e aital restaurar las foncions neuronalas perdudas”.
La tròba arriba aprés la publicacion de la descobèrta de fins a nou moleculas que podián convertir de cellulas en de neuronas mas lo còst per o far èra tròp grand economicament e clinicament. Per ansin, la quita còla de biològs cerquèt una manièra mens cara per poder aver lo quite efièch. E ara o an trobat.
De centenats de drògas possiblas
Aquela còla de biològs assagèt pendent d’annadas de trobar quala èra la formula quimia ideala pr’amor que caliá provar de centenats de drògas possiblas. Mas, fin finala, lo succès arribèt : “ En tot utilizar quatre moleculas que soslinhan la dralha vèrs los astrocites aquestes pòdon èsser convertits en de neuronas foncionalas, au mens en un 70% dels cases, çò confirmèt Jiu-Chao Yin, de l’Universitat de Penn”.
Amb aquela dròga las nòvas neurònas pòdon demorar fins a 7 meses dins un laboratòri e lor foncionament es parièr al d’autras neurònas cerebralas umanas. La dròga pòt èsser facha amb tres moleculas en luòc de quatre mas alara la taxa de conversion de cellulas en de nòvas neurònas tòmba fins al 20%. A mai ensajèron d’utilizar una soleta molecula mas sens capitar apuèi.
“Çò qu’es meravelhós, çò confirmèt Chen, es que lèu una soleta pilula qu’a aquelas moleculas poiriá èsser distribuïda per tota la planeta sens anar a l’espital. Cal ara trapar un sistèma eficaç de distribucion per poder ajudar de malauts d’Alzheimer e los far recuperar la sieuna capacitat memoriala perduda”.
Lo problèma ara es mai tecnic que medicinal. Per far aquela dròga cal utilizar mai d’una tecnica e apuèi poder la distribuir. A mai, la còla que descobriguèt aquela dròga trabalha encara per desvolopar de pilulas pro bonas per la santat umana. Mas çò qu’es segur es que serà un medicament revolucionari dins la lucha contra los desòrdres neurologics patits uèi lo jorn per de milions de personas en la planeta. “Sembla que sèm prèp, fòrça prèp de veire realizat lo nòstre sòmi, çò contunhèt Chen. Guarir l’Alzheimer serà lèu possible. L’estudi foguèt publicat al numeric Stem Cell Reports.
La Redaccion
