Ua còla de cercaires dera Universitat de Chicago descorbic çò que poirie èster un pas dera umanitat contra eth virus dera gripa. Atau, es scientifics descorbiren ua seccion naua d’anticòssi en diuèrsi virus que serien ua mès que bona base entà arreconéisher ua grana diversitat de virus dera gripa, e açò ajudarie fòrça entà hèr un vaccin universau entada aguesta malautia, e açò qu’ei un virus que cambie cada an. Er estudi siguec publicat ena revista online Nature.
“Ei totaument susprenent que, maugrat qu’auem estudiat aguest virus pendent annades i a tostemps quicòm nau entà descorbir, çò diguec Andrew Ward, deth Departament de Biologia d’aquera universitat. Pr’amor qu’auem identificat diuèrsi punts febles d’aguest virus que hè patir milions de persones cada annada ena planeta. E damb açò podem crear un vaccin contra totes es sues variantes”.
Un virus mortau
Èm ena epòca deth coronavirus, açò toti ac sabem, mès que cau saber tanben qu’eth virus dera gripa aucís mès de 20 000 persones cada annada sonque en es Estats Units. E mès de 20 milions de persones ne patissen era malautia cada annada. Es vaccins que i a aué ajuden a crear anticòssi qu’arreconeishen lèu eth virus e l’ataquen. Totun, non coneishiem totes es sues variantes. E donques qu’ei un vaccin fòrça limitat. Ara, totun, dilhèu auram un nau vaccin universau.
E maugrat qu’es scientifics ja an sajat un vaccin mès o mens universau, non aueren èxit. Aué encara i a diuèrsi vaccins d’aguest tipe que deuen èster sajadi enes persones. Totun, es cercaires de Chicago descorbiren mès de 358 tipes diferents d’anticòssi enes persones que ja auien arrecebut eth vaccin. Que non auien estats estudiats abans.
Quauquns non èren coneishuts. E son aguesti es qu’es cercaires considèren que son fòrça importants entara creacion d’un vaccin definitiu e universau.
Un estudi mès prigond d’aqueri anticossi (aperaquí 50) confimèc que podien identificar fòrça ben eth virus dera gripa o H1. A mès, tanben n’i auien quauqu’uns que tanben arreconeishien es pandèmies H2 e H5. En laboratòri artenhéren a crear una proteccion contra tres tipes diferents de grip H1.
“Es utís qu’auèm desde aguest descorbiment son fòrça mès grani qu’abans, çò apuntèc Julianna Han, coautora der estudi. Son anticòsssi fòrça comuns enes persones e tanben pòden èster produsits pes umans facilament. E açò ei fòrça important entà crear un nau vaccin universau e definitiu. Sonque cau crear diuèrsi metòdes d’engenharia des proteïnes entà auer un vaccin damb anticòssi pro potenti entà acabar damb era gripa a nivèu mondiau”.
Crear un vaccin universau contra era gripa, çò dideren es cercaires, ajudarie fòrça as anticòssi umans a lutar ben contra es defenses d’aqueth virus. E pr’amor d’açò ara aqueri cercaires son en tot estudiar com desvolopar un nau vaccin universau contra era gripa que, segontes aguest descorbiment, poirie ja auer es dies comptadi.
Era Redaccion
Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita
