Joan-Glaudi BABOIS es coneissut per aver publicat novèlas e de poesias en lenga d’òc (provençau), per aver editat la revista ESQUISSE bilingüa amé l’associacion L’ESPAVENTAU per aver realisat una emission en provençau sus ràdio país e per èstre estat president de Provença Tèrra d’òc (IEO Var) per quàuqueis annadas.
Leis abituats de Sapiéncia conéisson ben Joan-Glaudi BABOIS, per la publicacion de sei recèrcas matematicas (e coma mestreja mau lo clavier de son computador tèn à precisar que siéu ieu que l’ajudi per la messa en pagina de seis articles.
Ara apareisse dins wolfram math world, una mena de consecracion : https://mathworld.wolfram.com/PrimeSums.html
Una formula singulara
Joan-Glaudi a mes au ponch una importanta formula sus una soma à prepaus dei nombres promiers, publicada en 2020 dins la revista scientifica numerica Sapiéncia e dins lo jornau occitan Aquò d’Aquí sota lo títol “una proprietat caracteristica dei nombres promiers”
Una revirada en american fuguèt mandada a Neil Sloane, lo creator dau site de l’o-e-i-s (que J.-Gl. BABOIS es en relacion matematica amé eu). o-e-i-s es “the on-line encyclopedia of integer sequences” valent à dire « enciclopedia dei seguidas numericas entieras »
La formula trobada per J.-Gl. fuguèt notata coma teorema amé lo còdi A331764 lo 5 de febrier de 2020.
Au mès de janvier de 2021 J.-Glaudi a contactat lo site WOLFRAM MATH WORLD, partida PRIME SUMS onte la sieuna formula podia estre enregistada sota la rubrica “some curious sums satisfied by prime p include” (quàuquei somas curiosas satisficadas per lei nombres promiers p). Compòrta 4 paginas monte son notadas lei descubèrtas mai importantas sus lei somas de nombres promiers.
L’avié 2 formulas degudas au matematician DOSTER en 1993 repertoriadas A78837 e A78838, de fach la formula de J.-Glaudi (numero 38) es estada referenciada o-e-i-s A 331764 j-c babois pers.com jan 31 2021 prime sums.
La formula de J.-Glaudi es la mai recenta dins aqueu domani :
soma(i=1 jusca i=p-1, j=1 jusca j=p-1)[int(i*j)/p]=[(p-1)^3-(p-1)^2]/4
Wolfram math world nòta lei descubèrtas matematicas mai grandas. Çò qu’es tras qu’important, es de notar que Joan-Glaudi BABOIS lo solet matematician de lenga d’òc à i figurar. Una reconeissença meritada. Un eveniment que sembla gaire important per cu non s’interèssa ai matematicas, mai que mòstra polidament que la lenga nòstra es au nivèu deis autras. E que i a pas besonh de publicar en anglés per èstre reconeissut !
Un article de Reinat TOSCANO
