Una còla de cercaires del MIT (Institut de Tecnologia de Massachussets) desvolopèt amb l’ajuda de l’intelligéncia artificala un algoritme que pòt identificar de nòus antibiotics. Pendent l’experiment fach fins ara, al laboratòri solet es estat descobèrt un nòu compausat trapat per l’algoritme de l’IA, que poguèt aucir de centenats de bacterias uèi problematicas per lor resisténcia als antibiotics.
Lo modèl informatic utilizat pels scientifics del MIT trapèt lo nòu compausat quimic entre un milion e mièg e sonque calguèt tres jorns per o far. Segon James Collin, que dirigiguèt aquela còla, s’agissiá de “voler desvolopar un sistèma qu’ajudesse amb l’intelligéncia artificiala a trobar de nòus antibiotics dins la lucha contra los bacterias”.
Per ansin, far servir l’intelligéncia artificiala per far aquò es estat plan positiu pr’amor que ja s’es trobat una molecula que serà un dels pus poderoses antibiotics jamai descobèrts per l’umanitat, çò confirmèron los cercaires. En mai d’aquel compausat nomenat alicina, tanben s’es trobat d’autres candidats fòrça prometeires qu’encara devon èsser esprovats.
Segon los cercaires que faguèron la tròba, lo nòu modèl desvolopat per l’intelligéncia artificiala poiriá èsser emplegat per crear de nòus medicaments qu’ajudaràn a metre fin a fòrça malautiás umanas provocadas per de bacterias. E aquò se passa uèi lo jorn, quand fa de temps que crear un nòu antibiotic es considerat coma lent e car.
D’antibiotics tròp cars
La situacion actuala es que, dempuèi de decennis, s’es produch pauc de nòus antibiotics pr’amor que se considèra que còstan fòrça temps per èsser desvolopats e que, a mai, son fòrça cars. Los que foguèron desvolopats pendent los darrièrs ans an per basa d’ancians antibiotics, mas n’i a pas de nòus.
“Demoram a una epòca qu’a per trach una crisi de mai en mai prigonda perque los umans son de mai en mai resistents als antibiotics, çò diguèt Collins, del MIT. En mai d’aquò, i a de mai en mai de patogèns resistents als antibiotics e una recèrca mendre dins l’indústria biotecnologica e farmaceutica. Es per aquò que çò qu’avèm trobat es tant important”.
Per o far, los cercaires donèron una basa de mai de 100 milions de compausats quimics a l’intelligéncia artificiala, que lèu trapèt una molecula que podiá tuar la bacteria E. Coli. La molecula foguèt esprovada (l’alicina) per tuar d’autras bacterias e lèu descobriguèron que tanben aucissiá plan la bacteria A. baumanni en mai de las bacterias Clostridium difficile, Acinetobacter baumanni e Mycobacterium tuberculosis.
Segon los cercaires, ara cal trabalhar amb una companhiá farmaceutica per desvolopar un medicament pels umans basat sus l’alicina (qu’a lo nom d’Hal pr’amor de l’intelligéncia artificiala del filme 2001). En mai d’aquò cal tanben esprovar medicalament los possibles autres 23 compausats que l’intelligéncia artificiala trapèt en sonque 3 jorns. L’estudi es estat publicat dins la revista Cell.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
