RUSSIA VÒL ARRIBAR A JUPITÈR
Las nacions de la planeta vòlon arribar mai e mai luenh en l’espaci. Ara s’es conegut que lo nòu projècte de l’agencia espaciala russa seriá d’arribar fins a Jupitèr abans de l’an 2030. Per i arribar cal primièr enviar de fusadas a la Luna e puèi a Vènus amb una nòva tecnologia (pas pels umans actuals) jamai encara utilizada en viatges espacials: la propulsion nucleara. Un tecnologia que la quita NASA reconeissèt que poiriá èsser lèu usada per totes los govèrns de la Tèrra e que redusiriá lo viatge de la nòstra planeta a Mart a sonque doas annadas (anar e tornar).
Segon aquesta notícia Russia seriá ja en tot bastir una nau espaciala que foncionarà amb de propulsion nucleara. La tòca serà poder arribar en l’an 2030 a la Luna e puèi a Vènus. Lo darrièr e mai important objectiu d’aquesta nau espaciala russa seriá poder arribar fins a Jupitèr; aquesta mission pasmens seriá plan mai longa, d’aperaquí 50 meses.
Per aquò poder far, e segon confirmèt un comunicat oficial de l’agència espaciala russa Roscomos, cal d’en primièr, lançar un remorcaire espacial, nomenat Zèus que seriá la nau usada pels astronautas e l’equipatge per se desplaçar d’una planeta a l’autre. A mai d’aquò, los russes tanben presentèron lo dessenh d’una nòva estacion espaciala que tanplan foncionarà amb de tecnologia nucleara. Serà aquesta estacion espaciala que recebrà la nau espaciala nucleara, coneguda amb lo nom d’Orel.
Per ansin, lo remolcaire Zèus utilizarà un reactor nuclear de mai de 500 quilowatts per viatjar e serà doncas una planta nucleara entièra que viatjarà per l’espaci exterior. Segon una primièra avaloracion dels scientifics russes per arribar a Jupitèr cal 4 annadas e 2 meses.
La tòca oficiala d’aquel viatge espacial rus seriá arribar a Jupitèr per descobrir se dins la planeta i a un nuclèu intèrn solid. Mas arribar a Jupitèr pels russes seriá sonque un episòdi mai de la siá corsa espaciala car vòlon aver ja bastida una estacion espaciala pròpria aperaquí l’an 2025. E segon los russes tanben aquel tipe de viatges espacials nuclears dubririá una nòva edat espaciala per l’umanitat. Pr’açò Russia ja lancèt mai de 30 reactors nuclears en l’espaci. De soslinhar qu’uèi lo jorn sonque i a dos tipes de tecnologia que los umans pòdon usar dins l’espaci: la nucleara o l’electrica e la termica. E la nucleara seriá la pus potenta.
La Redaccion
