De problèmas grèus per la santat. Aquesta es la resulta d’un nòu estudi scientific fach sus cossí pòt arribar a afectar èsser fòrça temps a l’espaci. Es un autre estudi après divèrses autres que ja indicavan aqueste fach. Ara foguèt confirmat que demorar mai de 18 jorns a l’espaci pòt crear grèus problèmas a las defensas intestinalas dels astronautas e doncas entraïnar grèus problèmas de santat.
Ara, e segon un estudi publicat al numeric Scientific Reports pel cercaire Declan McCole, de l’Universitat de Califòrnia a Riverside, foguèt confirmat que demorar a l’espaci pòt entraïnar l’arrèst del sistèma epitelial dels intestins dels astronautas e aquò, al còp, pòt arribar a provocar grèvas malautiás encara aprés tornar a la Tèrra.
Las cellulas epitelialas son aquelas situadas als nòstres intestins e que fan una barrièra contra una possibla envasion de viruses, bacterias e d’autres agents nocius per la nòstra santat. Lo nòu estudi a coma resulta que la microgravetat, çò es aquela que i a dins l’espaci, o dich d’un autre biais, en defòra de la Tèrra, pòt entraïnar un arrèst total del foncionament de la barrera epiteliala e doncas l’arribada de grèvas malautiás pels viatgèrs de l’espaci.
“Es lo primièr còp que s’estudièron los possibles cambiaments que pòt patir la barrièra epiteliala dels astronautas, çò diguèt Declan McCole. Los problèmas pòdon arribar a èsser grèus fins a puèi d’aver tornat a la Tèrra, au mens fins a 14 jorns apuèi”.
De viatges espacials perilhoses
Malgrat qu’aqueste es pas lo primièr estudi que confirma que viatjar en defòra de la Tèrra pòt entraïnar problèmas per la santat umana es lo primièr que confirmèt medicalament qu’aquestes pòdon arribar encara aprés la tornada a la planeta blava. Las patologias trobadas son mai grèvas pr’amor del risc que i a dins l’espaci.
“La microgravetat a d’efièchs prigonds sus la fisiologia umana, çò apondèt McCole. Pòdon arribar de malautiás coma gastroenteritis car l’arrèst de la barrièra epiteliala pòt entraïnar la dintrada de bacterias coma la salmonèla. En mai d’aquò, avèm pogut agachar qu’encara doas setmanas après la tornada a la Tèrra las malautiás pòdon aparéisser coma resulta del temps demorat a l’espaci de manièra parièra”.
Segon aqueste estudi sul foncionament de la barrera epiteliala a l’espaci, la resulta finala d’aquesta se pòt veire totalament arrestada e aquò entraïnarà lo risc de maitas malautiás intestinalas. Entre aquestas mantunas inflamacions dels intestins, de malautiás celiacas, diabète de tipe 1 e encara mai d’una malautiá del fetge.
L’estudi se debanèt sus divèrses astronautas que demorèron dins un environament pròche al de l’espaci, amb de microgravetat, e pendent prèp de tres setmanas. Pendent aquel temps los astronautas comencèron a patir divèrsas malautiás intestinalas durant o puèi “lo vòl espacial”.
Lo risc de patir aquel tipe de malautiás aprés sortir de la nau rotatòria barrada amb de microgravetat contunhèt encara pendent doas setmanas pr’amor que i aguèt d’individús que patiguèron aquelas malautiás un còp èran defòra. E la causa ne foguèt l’arrèst de la barri+era epiteliala de l’intestin dels astronautas. Un risc per la santat d’aqueles.
La Redaccion
