Un recent estudi genetic confirmèt que los Aita Magbukon de Filipinas son la populacion amb ADN denisovan mai naut de tota la planeta. L’estudi foguèt fach per l’Universitat d’Uppsala e suggerís que plusors espècias arcaicas umanas arribèron e visquèron en aquelas illas asiaticas abans de l’arribada de l’òme modèrn e pr’açò totes aqueles grops umans arcaics ne serián familha.
Uèi lo jorn es plan conegut que nòstra espècia se crosèt amb d’autras espècias umanas primitivas al long de l’istòria e l’espaci de la planeta. I aguèt de crosaments amb de neandertalians e tanben amb denisovans e, de segur, amb d’autras espècias primitivas umanas, encara pas conegudas uèi lo jorn.
Es conegut que los europèus e los asiatics occidentals an una carga de gèns neandertaliana plan nauta. Tanben es conegut que los asiatics orientals an fòrça gèns denisovans. E ara tanben foguèt confirmat scientificament que la populacion aborigèna originària filipina, aqueles tanben coneguts amb lo nom de negritos serián la populacion mas pròcha a los australopapuans e qu’an un nivèl de gèns denisovan tras que grand.
A l’estudi, dirigit per Maximilian Larena, los cercaires analizèron 1.107 gèns de 118 individús filipins dont 25 negritos (mai que mai demest los Aita). La resulta de l’estudi confirmèt que los Aita Magbukon an lo nivèl genetic denisovan pus naut de tota la planeta. “L’estudi es clar pr’amor qu’aquesta populacion filipina a mai d’un 46% mai d’ADN denisovan que los quites australians e tanben los papuans, çò diguèt Larena”.
Divèrses grops umans primitius
Segon aquò e la descobèrta recenta d’Homo luzonensis tanben a Filipinas suggerís que i aguèron plusors espècias d’umans primitius abans de l’arribada d’Homo sapiens sapiens a aquelas illas.“ A las illas del sud-èst d’Asia los negritos filipins se crosèron amb de migrants de l’est asiatic amb una fòrta carga denisovana. Los Aita Magbukon, çò confirmèron los cercaires, tanben s’i crosèron e pr’açò an lo nivèl pus naut d’ADN denisovan de tot lo mond”. L’estudi foguèt publicat al numeric Current Biology.
La Redaccion
