D’esqueletas de mai de 35 personas son estadas trobadas a mai de 5.000 mètres, al lac Roopkund, a l’estat indian d’Uttarakhand, çò es dins l’Imalaia. Segon una còla de cercaires qu’arribèron al luòc per estudiar aquelas esqueletas, son un grop de grècs qu’emigrèron ailà fa 220 annadas. Mas aquò resòlv pas lo mistèri pr’amor qu’ara encara pòdon se mandar qué fasián de grècs ailà naut fa 220 ans ?
Las esqueletas apartènon a un grop de grècs e d’abitants de Creta que marchèron fa aperaquí 220 ans de son luòc d’origina e marchèron a l’Imalaia se sap pas perqué? Los cercaires, que poguèren confirmar l’origina de las esqueletas amb un estudi de l’ADN de las meteissas, ara se demandan cossí moriguèron aqueles grècs de l’an 1799-1800 e perqué èran arribats ailà.
“Çò de pus estonant foguèt pas trapar un grop de personas mòrtas sepelidas a l’Imalaia, un fach que se debana de temps en quora, çò diguèt lo paleogenetician Niraj Rai, de l’Institut de Paleosciéncias de Birbal Sahni (Lucknow). Çò de mai susprenent foguèt saber a travèrs l’estudi de l’ADN, que lor origina èra mediterranèa. Cossí arribèron ailà ?”
D’un autre costat, a mai d’aquel grop de grècs e de mediterranèus, los cercaires tanben trapèron mai d’esqueletas al quite luòc. Totun, qu’aquelas avián coma origina lo sud-èst asiatic e que moriguèron fa pus de 1.200 annadas. Aquò ja foguèt considerat mai normal pels cercaires, pr’amor que, tradicionalament, de hindús fan de peregrinacions a de luòcs restacats amb aquela religion e o fan en tot crotzar lo lac Roopkund, situat a mai de 5.000 mètres de nautor, dins las montanhas de l’Imalaia.
Una catastròfa naturala
Segon la còla de cercaires indians, los peregrins que moriguèron en aquel luòc fa mai de 1.200 ans, poirián aver patit una catastròfa naturala en tot crotzar lo lac pr’amor que prèp d’ailà, al nòrd d’Índia, i a un santuari de la deessa Nanda Nevi e de situacions coma aquela se debanan de temps en quora. Totun, los scientifics contunhan de se demandar qué fasián ailà de mediterranèus.
La Redaccion
