L’Incendi que comencèt pendent lo començament d’estiu en Siberia (benlèu cal parlar melhor d’incendis) contunha de cremar e las autoritats russas reconeguèron oficialament que ja i a mai de 4 milions d’ectaras cremadas, çò que permet classar la situacion coma una vertadièra catastròfa a nivèl mondial environamental.
Çò que fa mai grèva aquela situacion es que maugrat que los govèrns regionals implicats e lo quite govèrn central rus confirmèron que los incendis serián contrarotlats lèu, la realitat es una autra: la superfícia ont encara i a de fuòcs – que n’i a plusors – es mai granda que Soïssa e ne los pompièrs nimai l’armada russa son encara luenh de poder los contrarotlar.
En mai d’aquò, una guèrra de declaracions es començada entre los mejans de comunicacion russes aligats del govèrn de Putin e divèrses grops aparaires de l’environament coma Greenpeace, que soslinhan que la situacion es tras que grèva e que ja pòt èsser considerada coma un vertadièra catastròfa environamentala mondiala.
Per ansin, e del còp que los pompièrs e los soldats de l’armada russa pòdon pas escantir los diferents incendis que i a dins la region – e que segon divèrses grops ecologistas aurián coma origina l’indústria de la fusta russa -, mai d’un satellit poguèt enregistrar d’imatges de l’airal cremat e dels fuòcs qu’encara son vius. E aquò semblariá èsser contrari al vejaire de las autoritats russas qu’afirman que la situacion es pas tant grèva.
La Republica de Sakha en flamas
Un dels darrièrs vidèos coneguts es un d’Annamaria Luongo, que poguèt l’enregistrar de Google Earth e apuèi lo metre dins Internet per lo far public. I a d’imatges de pus de 2.000 quilomètres de bòsc e taigà que creman . Son d’imatges estonantas que confirman lo chaple faunistic que patiguèt la region dempuèi lo començament dels incendis.
En mai d’aquò, Greenpeace tanben volguèt soslinhar que las emissions de CO2 qu’an coma origina aqueles fuòcs pendent aqueste estiu son ja màgers de que las de 36 milions d’autos pendent una anada e qu’aquò serà una catastròfa environamentala que poiriá cambiar mai encara lo clima de la planeta. E sus aquel incendi los mejans de comunicacion occidentals ne parlan brica.
La Redaccion
