Se pensam que solament los òmes a l’anciana Egipte avián piramidas e que las femnas avián un ròtle segondari sèm enganats. La descobèrta d’una piramida de la reina Seheshet prèp de Lo Caire confirma lo grand ròtle qu’avián las femnas dins una societat pro egalitària, la de l’anciana Egipte.
La piramida de Sesheshet qu’es ja coma es coneguda aquesta piramida egipciana, a una edat de 4.300 annadas e es una de las mai de 118 piramidas trobadas fins a uèi lo jorn a Egipte. La descobèrta es estada confirmada pel cap d’antiquitats d’Egipte, Zahiu Hawass.
La piramida es estada escavada pendent mai de dos annadas e fa prèp de cinc mètres de nautor tot e que los arqueològs pensan que en origina fasiá mai de 14 mètres de nautor e 22 mètres d’amplada. La piramida es estada trobada en plan bon estat, çò confirman los arqueològs que i an trabalhat.
Una reina poderosa
La reina Sesheshet foguèt la maire del faraon Tetí, lo fondator de la darrièra dinastia de l’Anciana Egipte. Aquesta epòca es coneguda pr’amor que foguèt una epòca de conflictes e crisi sociala e politica. Pendent la fin d’aquesta dinastia Egipte se partiguèt en divèrses regnes e passarián sègles abans de la sieuna reunificacion.
En aqueste contèxt de fam e revòltas socialas, la reina Sesheshet ordenèt bastir la que seriá una de las primièras piramidas de l’Egipte anciana. Solament cal veire las sieunas mesuras per confirmar qu’es tanben una de las piramidas mai umils. La darrièra dinastia (6a) de l’Anciana Egipte regnèt entre los ans 2.323 e 2.291 abans de Crist.
La piramida de Sesheshet es estat trobada a l’airal de Saqqara, fòrça prèp de las autras piramidas fachas après de Keòps, Dejdefra, e Menkaura. Ara los arqueològs i vòlon dintrar per poder confirmar definitivament que la piramida es la de la reina Sesheshet. Totun, la credença qu’es ela ja es solida.
Christian Andreu
