Antoni Gaudí e Cornet (1852 – 1926) es un dels arquitèctes mai importants de l’Istòria de l’Art. Mas sabiatz que l’origina de la siuena familha paternala èra occitana? Nascut a Riudoms o Reus (existís una polemica sus la vila de naissença), las investigacions als registres parroquials parlan de l’existéncia en aquela meteissa vila catalana de Riudoms de Joan Gaudí l’an 1630, filh d’Antoni Gaudí e de Joana, qu’èra arribat d’una vila occitana, probablament de la region de l’Auvèrnha.
Aquel Joan Gaudí podiá èsser un dels milièrs d’occitans qu’arribèron al Principat de Catalonha pendent lo sègle XVII, en fugent de las guèrras de religion (de catolics contra d’uganauds) que destruissián las tèrras occitanas e cercavan de patz e d’estabilitat economica. Pendent lo sègle XVII un tèrç de la populacion del Principat èra occitan o descendent d’occitans.
Dos maridatges
Consolidada la siuena preséncia a Riudoms, Joan Gaudí se maridèt dos còps. L’an 1634, amb la primièra femna, Maria Escura, amb qui aguèt tres filhs, del temps qu’amb la segonda, Caterina Esquer, quatre. En contunhant la tradicion catalana, lo filh primogènit del primièr matrimòni, tanben nomenat Joan, venguèt l’eretièr del patrimòni de la familha. Los immigrants occitans acostumavan a aver de problèmas per trobar de femnas pels dobtes sus las siuenas originas, mas sembla que Joan Gaudí patiguèt pas aquela problematica.
Una autra demostracion de las originas occitanas de Joan Gaudí es lo sieu testament, escrich en lenga catalana lo 21 d’abril de 1638, mas amb qualques paraulas en lenga occitana dins del tèxt, que demòstran una mescla lingüistica en lo parlar de Joan Gaudí.
Un article de Francesc Sangar*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
Fotografia principala: Ilustir/CC.
