L’IA JA COMPREN MELHOR LAS EMOCIONS QUE LOS UMANS
Segon un nòu estudi soís, l’IA ja comprendriá melhor las emocions que los quites umans. La descobèrta poiriá revolucionar la sciéncia e l’educacion. Segon aquel estudi, de modèls coma ChatGPT ja supèran los umans en compreneson emocionala e tanben pòdon crear de tèstes psicologics en un temps recòrd.
Pr’amor que fins ara l’intelligéncia emocionala èra estada considerada coma una capacitat sonque umana e de fòrça mal recrear dins de maquinas. Mas aquel nòu estudi publicat dins lo numeric Communications Psychology per una còla de scientifics de las Universitats de Genèva e Bèrna o a tot cambiat.
Segon aquò, fins a sièis modèls de lengatge artificial, dont ChatGPT-4, poguèron resòlver una batariá de provaments que volián mesurar l’intelligéncia emocionala en d’umans, e tanben despassèron fòrça amplament los umans.
La recèrca, dirigida per Katja Schlegel e Marcello Mortillaro, aviá per tòca d’avalorar se los modèls de lenga actuals podián tanben interpretar, regular e respondre corrèctament a de situacions emocionalas. Cincs tèstes estandard foguèron emplegats. Èran de provaments de psicologia que simulavan de conflictes al luòc de trabalh, d’incomprenesons interpersonalas e encara de dobtes emocionals quotidians. I aviá mai d’una responsa.
L’IA compren melhor las emocions umanas
La resulta del tèst foguèt que de modèls coma ChatGPT-4 o Claude 3.5 Haiku avián plan respondut a fins a l’81% dels cases. Los umans sonque arribèron a un 56% de succès. Aquò vòl dir que los sistèmas d’IA non solament imitan lo comportament uman mas tanben interiorizan de modèls complèxes de rasonament emocional.
Pendent una segonda fasa del provament, a ChatGPT-4 foguèt demandat de generar de nòvas situacions emocionalas amb lors responsas. Aquò pren d’annadas a de còlas d’umans per o far. Mas foguèt fach en sonque qualques minutas. 400 personas validèron los nòus tèstes, qu’èran mai clars, realistas e divèrses. Aquò demostrèt qu’èran encara melhors que los realizats per d’umans.
Aital, lo potencial practic de la descobèrta es gigantàs, per l’educacion emocionala, l’entraïnament executiu, o la gestion dels conflictes, e aquò poiriá cambiar la formacion de los professionals del futur.
L’IA doncas pòt saber quand sèm estransinats, tristes o desmotivats, e suggerís d’estrategias emocionalas adaptadas. Tanben dins lo mond dels negòcis, l’intelligéncia emocionala artificiala poiriá servir per prevenir de crisis o melhorar la coesion dels grops.
Ça que la, los cercaires avertisson qu’emplegar aqueles modèls a d’èsser totjorn susvelhat per de professionals umans. L’IA pòt èsser poderosa, mas a d’èsser integrada a la psicologia amb prudéncia, etica e supervision umana. Car, s’una maquina pòt comprene una emocion, predire lo sieu impacte, e suggerir cossí o melhor gerir melhor, aquò es pas d’empatia foncionala?
Benlèu es pas una empatia sincèra mas utila, que pòt generar de resultas positivas. E aquela “empatia algoritmica” poiriá melhorar las emocions umanas en de situacions ont los prejutjats, las emocions desbordantas, o la manca d’autoconeissença son comuns.
La conclusion es qu’ara o cal questionar tot mai: se podèm los umans gerir melhor las emocions que l’IA? S’aquesta nos pòt ensenhar a venir mai intelligents emocionalament? Abans, aquò semblava de sciéncia-ficcion mas ara o es pas pus. E es lo començament de la coneissença que las maquinas pòdon comprene, avalorar e melhorar. Elas e per nosautres.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
