Cleopatra VII Filopator qu’estó la darrèra reina de l’Egipte classica . Dab era qu’acabava lo linhatge d’origina macedoniana dels Ptolomèus o Lagidas qui avèvan governat lo país del Nil pendent tres sègles. Mes com estó la mort d’aquera mitica sobeirana? Aquera tragica fin que succedí probablament pendent lo mes d’Agost de l’an 30 abC dens lo capdulh egipcian, Alexàndria.
Vençuda per Octavi Auguste, e mort lo son marit Marc Antoni, Cleopatra que suspectava que lo son destin seré ua abaishanta exibicion publica a Roma e que veneré segurament esclava de qualcuna familha patrician romana. La soa sòr Arsinoe IV, vençuda per Juli Cesar (ancian galant de Cleopatra) qu’avèva patit aqueth maishant finau. Cleopatra que preferiva morir dab d‘aunor e que preparè lo son suicidi. Qu’avèva comunicat au pròpri Octavi Auguste qui “seré pas exibida com un trofèu a Roma”.
La darrèra letra
Prumèr, la reina que visitè e qu’aunorè lo cadavre deu son defunt marit Marc Antòni. Posteriorament, que tornè au palais, on après un banh de purificacion, que’s vestí dab tot lo luxe d’ua sobeirana, que sopè e qu’escrivó ua letra a Octavi Auguste, on exprimiva au futur emperador roman lo son desir d’èste sepelida a la broa deu son marit Marc Antoni.
Recebuda e lejuda la carta, Octavi Auguste que comprenó que la tòca de Cleopatra èra lo suicidi, e qu’enviè los sons soldats dab la mira d’evitar la mort de la reina. Mes quan los soldats romans arribèn au palais egipcian, que trobèn Cleopatra morta sus un divan daurat, dab la corona au son cap. Mitica fin entà la darrèra sobirana d’Egipte. Au son costat, que jasèn tanben mortas duas fidèlas servents qui avèvan preferit acompanhar la lor reina dens aqueth darrèr moment, Iras e Carmion.
La legenda qu’explica que Cleopatra avèva patit lo nhac d’un àspid, ua sòrta que se percep plan verenhosa, maugrat que los soldats romans trobèn pas l’animau. La cultura egipciana qu’èra plan expèrta en posons, e que sembla que Cleopatra avèva estudiat los efèits e las consequéncias deu nhac de diferentas espècias de sèrps. Dus punts a l’espatla de la reina que semblavan indicar aqueth nhac, mes que poirén tanben significar l’injeccion de quauque poson miejançant ua agulha.
Pendent lo desfilat trionfau d’Octavi Auguste a Roma entà celebrar la victòria sus Cleopatra e Marc Antòni, e l’incorporacion d’Egipte com província de l’Empèri Roman, la figura de la darrèra reina egipciana qu’estó representada dab un àspid ligat au son braç.
Cleopatra e Marc Antòni qu’estón sepelits amassa dab d‘aunors de monarcas; Octavi Auguste que complí dab la soa promesa sus la darrèra volontat de la reina egipciana. Sus l’emplaçament deu son cadavre, qu’an existit tanben divèrsas teorias, mes que’s son trobadas pas enqüèra las soas despulhas mortaus .
Guèrras e fenomèns naturaus coma tèrratrems que destrusín lo palais e que cambièn l’orografia de la vila d’Alexàndria en prejudicant las recèrcas arqueologicas. Trobar lo son tahuc uèi que seré tota ua notícia ligada a un deus personatges mei mitics de l’istòria.
Un article de Francesc Sangar*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
