Ara los cercaires an trapat que la cultura seriá un factor fòrça mai important que la genetica per s’adaptar melhor als cambiaments que patís nòstra espècia. D’efièch, dos cercaires, Tim Waring e Zach Wood, après o estudiar, arribèron a la conclusion que los umans, a l’ora d’ara, sèm dins una transicion evolutiva plan especiala, perque la cultura seriá plan mai importanta per nòstra evolucion que la genetica. E aquò farà de nòstra espècia, tanben, un grop mai divèrs.
Segon l’estudi realizat per aqueles dos cercaires de l’Universitat de Maine, los umans s’adaptan plan melhor a l’environament amb la cultura e d’un biais plan mai rapid que per mejan de la genetica. L’aprendissatge, la practica d’aqueste e las competéncias umanas serián, doncas, plan mai utilas a long tèrme per l’èsser uman, mai encara que los cambiaments genetics.
Fins ara, lo factor cultural èra mespresat pels cercaires quand volián estudiar l’evolucion umana. Totun, la cultura seriá çò qu’ajuda d’un biais prigond l’òme a s’adaptar melhor a l’environament contemporanèu e a far créisser l’escasença de subreviure. E la cultura seriá un factor plan mai eficaç pr’amor qu’es mai rapida e flexibla.
Plusors rasons confirmarián aquela resulta: mentre que los cambiaments genetics sonque an luòc un còp cada generacion, la cultura pòt èsser apresa d’una manièra pus rapida e puèi pòt cambiar. A mai, l’eiretatge genetic es limitat als parents, mentre que la cultura pòt aver mai d’una font e l’escasença d’aprene dels autres es fòrça mai granda qu’aprene sonque dels parents. Coma resulta ara i a una evolucion culturala plan mai fòrta dins nòstra espècia. Plan mai que sonque per l’adaptacion genetica.
Una espècia unica dins lo mond
L’estudi es publicat dins lo numeric Proceedings of the Royal Society B, e segon Waring “aquò confirma perqué sèm una espècia unica dins lo mond animal. Evolucionam a l’encòp d’un biais genetic e tanplan d’una faiçon culturala, e sèm totjorn que mai una espècia culturala e mens genetica”. A mai, segon aqueste cercaire, la cultura auriá entraïnat un nivèl d’agression mai bas, una màger cooperacion, e la capacitat d’aprene de la societat ont demoram. Pasmens, la cultura a de besonh de la genetica per contunhar.
La cultura, en mai d’aquò, es collectiva, e ajuda a far subreviure melhor los diferents grops umans, encara mai quand son grands (e doncas pas pichons). “L’avenir serà una evolucion vèrs de grops umans qu’agiràn coma de superorganismes, coma una societat de formigas. Una pròva d’aquò l’avèm amb la pandemia de COVID-19, quand la responsa foguèt governamentala e doncas gropala e pas individuala. Aquò es un pas de mai vèrs un tipe de societat plan mai collectiva e plan mens individuala”.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
