La descobèrta recenta d’una tauleta del periòde babilonian antic amb d’operacions geometricas complèxas a confirmat l’exemple mai ancian d’una operacion matematica d’aquel tipe sus la planeta. L’operacion seriá del 3700 abans lo Crist, e seriá lo solet tèxt del cadastre d’aquela epòca. La tauleta a per nom Si.427 e, segon los cercaires, lo tèxt confirmariá que foguèt utilizada per definir una frontièra.
“Es una tauleta babiloniana que parla de geometria e d’acòrdis legals sus un prat que veniá d’èsser vendut, çò diguèt Daniel Mansfield, de la facultat de matematicas de l’Universitat de Nòva Galas del Sud, en Austràlia. Es un escrich antic tras qu’important car es lo pus ancian ont se trapa l’usatge del triangle de Pitagòras per bastir d’angles dreches”.
“I a un fum de triangles de divèrsas talhas sus las tauletas anticas, çò apondèt Mansfield, mas sonque qualques unes foguèron emplegats pels ancians babilonians per de rasons practicas, perque volián bastir de palaisses, de temples, de canals o encara atermenar de prats. Amb aquesta tauleta, sonada Si.427, avèm pogut agachar cossí establissián los limits”.
Segon los cercaires qu’analisèron la tauleta, lo periòde que foguèt escricha correspond al moment que las tèrras venián de mai en mai privadas e que caliá definir de limits als prats. Es çò que fa la tauleta, un tèxt que definís la frontièra entre dos prats de doas familhas diferentas. Es una discussion entre lo grand proprietari Sin-bel-apli e una veusa sus un grop de palmièrs situats al limit dels dos prats. L’administrator local, per mejan de son ampla coneissença de la geometria, ne donèt la solucion definitiva. L’estudi es publicat dins lo numeric Foundations of Science.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
