Es ancians polinesi aueren contacte damb es indigènes americani fòrça abans non se pensaue

Au mens, fòrça abans qu’es europèus arribèssen ath continent american e damb açò, ja serien es tresaus en arribar-i dempús des vikings, e es polinesi (e dilhèu es chinesi). Açò ei era resulta d’un nau estudi hèt per ua còla de cercaires genetistes: an trapat evidéncies clares entre polinesi e indigènes americani que se passèren au mens pendent eth sègle XIII.

“Ère ua escasença reau çò diguec Alexander Ioannidis, cercaire dera Universitat d’Stanford. Enquiara i auie cercaires que confirmauen qu’en airau dera Polinesia i auien plantes solament americanes, coma era truha doça o d’autes mès. Totun, i auien fòrça cercaires que didien qu’açò non ère mès qu’ua teoria. Mès ara un estudi genetic confirmèc que tot açò siguec reau”.

Entà hèr aguest estudi sigueren analizadi 807 individus de diuèrses isles polinesies e tanben 15 grops d’indigènes americani que demoren encara ena còsta deth pacific americana, des de Chile enquia Mèxic. Dempús d’analizar de manèra prigonda eth sòn ADN, sigueren trapades pròves que demostrauen que i auie mès d’un ancessor indigèna american entre es polinesi.

Au mens un còp

“Segontes aguestes pròves genetiques, es polinesi e es indigènes americani se trapèren au mens un còp ath long dera istòria, çò diguec Ioannidis. E aueren hilhs e hilhes. Segontes eth sòn ADN açò se passèc aperaquí era anada 1200 dera nòsta edat e açò qu’ei era madeisha epòca en que diuèrses d’aguestes isles sigueren abitades”.

Es cercaires trapèren era origina d’aqueri indigènes americani que se n’anèren enquia Polinesia ena Colómbia actuau. E volèren rebrembar qu’era istòria qu’auem aué ei encara ua istòria hèta pes europèus, que conquistèren America mès qu’ara era genetica poirie ajudar a cambiar. Er estudi siguec publicat ena revista online Nature.

Era Redaccion

Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita