Un nòu estudi demòstra que viure dins un environament san ajuda a viure fòrça mai longtemps. E, doncas, viure dins de comunautats que son pas tròp grandas pòt ajudar a aténher los 100 ans. La genetica es un factor clau, òc, mas viure en cèrts luòcs seriá plan util per esperlongar sa vida de fòrça mai d’ans. L’estudi foguèt fach per una còla de cercaires de l’Universitat de l’estat de Washington.
L’estudi, publicat dins la revista numerica International Journal of Environmental Research and Public Health, a analisat durant d’annadas de donadas de la populacion que viu a Washington dins de comunautats mejanas. La resulta de l’estudi confirmariá que las personas que pòdon melhor venir centenaris son las que demòran, justament, dins aquelas comunautats mejanas. Aquò sens desmembrar que lo nivèl social tanben jòga un ròtle important.
“De factors socials mas tanben environamentals serián doncas essencials per viure fòrça longtemps, çò ditz Rajan Bhardwaj, qu’a participat a aquel estudi. Aquò confirma que la genetica es pas lo sol element de la longevitat. D’estudis anteriors avián confirmat que l’eiretatge genetic personal sonque determina entre lo 25% e lo 35% de la durada de vida d’una persona. Pas mai. Mas aquò pòt cambiar segon lo luòc ont vius”.
Un estudi sus 145 000 personas
Aquò vòl dire qu’un environament clau ajuda fòrça a viure mai longtemps e ajuda la genetica personala. La còla estudièt las donadas de mai de 145 000 abitants de l’estat de Washington qu’èran mòrts a 75 ans o delà entre los ans 2011 e 2015. Las donadas tanben inclusián l’edat, la residéncia, lo sèxe, la raça, lo nivèl educatiu e la situacion matrimoniala.
Aital, los cercaires analisèron de milièrs de donadas de personas segon lo luòc ont demoravan. Tanben analisèron divèrses factors coma la classa sociala, l’accès a la seguretat sociala, quant de temps fasián d’exercici, qual trabalhavan, la pollucion de l’airal, e quant de temps èran prèp del bòsc. La resulta foguèt de poder determinar se lo luòc èra tanben un factor clau per tal d’aver una vida mai longa.
Far d’exercici de manièra jornadièra, èsser de nauta classa sociala, e trabalhar èran de donadas basicas qu’ajudavan a viure mai longtemps. Dins de comunautats mejanas, malgrat çò que se pòt pensar, i a mens d’isolament personal e las gents s’ajudan mai; la comunautat es mai solidària.
La resulta de l’estudi, doncas, confirmariá que viure dins de comunautats mejanas e de centres urbans pichons e mejans ajudariá la genetica personala a arribar a l’edat de 100 ans. Per ansin, ara prepausan de crear de comunautats mai sanas segon la populacion per ajudar a la longevitat. Cal veire, totun, çò que ne pensa la classa politica.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
