D’IA AMB IMAGINACION
Se podèm arribar de creire qu’un robòt (tanben conegut amb lo nom tecnic d’intelligéncia artificiala o IA) pòt pensar coma nosautres, umans ? Que pòt capitar a aver d’imaginacion ? Car l’imaginacion es una caracteristica mentala sonque umana. Doncas ara la sciéncia o a pogut far en tot crear una IA amb un nivèl d’imaginacion pròche del dels umans.
Totun, es de mal creire, perque l’imaginacion ajuda a representar d’objèctes e d’idèas que son pas totjorn vertadièras dins lo mond real. Mas una còla de cercaires a pogut crear un sistèma que permeta a una IA d’agir amb d’imaginacion, en mai de pensar, rasonar e agir coma se foguèsse un èsser uman. Amb aquò l’IA pòt imaginar las possiblas consequéncias d’una decision. E o pòt far abans de decidir.
Las IA son estadas desvolopadas pels umans dempuèi l’an 1956 e ara avèm pogut concebre una IA amb de rets neuronals pròpris, qu’agisson tanben coma nosautres, que pòdon rasonar coma se foguèssen d’umans expèrts e amb una intelligéncia pròpria. Sonque demorava de las poder ajudar a imaginar de causas. La reüssida es venguda après qu’una còla de cercaires de l’Universitat de Califòrnia del Sud poguèt far imaginar a una IA un objècte de diferentas proprietats, coma o fan los umans.
Una estapa nòva
Malgrat que lo prètzfach pòsca semblar gaire important, es un eveniment revolucionari dins lo mond de la robotica e qu’aviá pas jamai agut luòc fins a uèi. Fins ara, los sistèmas amb d’IA podián solament predire de causas segon d’algorismes matematics. Pas mai. Ara l’èsser uman a ensenhat a l’IA a imaginar de causas qu’existisson pas. E a ben capitat a o far.
Pasmens, l’experiment es pas en sa fasa finala car, malgrat que l’IA pòsca imaginar de causas non realas, encara manca (bravament) de logica. Una caracteristica tipica tanben dels umans. Mas los cercaires son optimistas car creson que las IA desenant poiràn reagir a tota sòrta de situacions nòvas en tot imaginar çò que pòdon far. L’arribada de la logica dins aquel procès, çò soslinhan los cercaires, es sonque question de temps.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
